Arkaitz Goikoetxeak berak epaiketan uko egin zion fiskalari erantzuteari eta atxilotu zutenetik "mehatxu, txantaje eta kolpe ugari" jaso zituela salatu zuen. Bideoari buruz, hauxe esan zuen: "Aurreko eguneko deklarazioan esandako hitz berberak dira entzun dituzuenak. Gauza bera ez esateak nolabaiteko ondorioak izango zituela banekien". Bestalde, dagokionean, abokatuek irudiok sortzen dituzten zalantzak argitzeko eta komisarietan atxilotuek egindako deklarazioak baliogabetzeko eskatuko diote tribunalari.
Komisariako irudietan "gauza bitxiak" ikusi dituzte Goikoetxea, Gutierrez eta Cotanoren abokatuek
Egunotan Arkaitz Goikoetxea, Iñigo Gutierrez, Aitor Cotano eta beste lau euskal herritarrei egiten ari zaizkie epaiketa Espainiako Auzitegi Nazionalean, ETAren "Bizkaia sarea" osatzen zutelakoan. Asteleheneko bistan aipatu lehenengo mutila poliziez inguratuta eta Baltasar Garzon epaileak lagunduta agertzen zen bideo bat plazaratu zuten. Horren ostean, oihartzun handia eman diete irudiei hedabideek, besteak beste, Benjamin Atutxa Eibarreko PSE-EEren zinegotzia "bahitzeko eta hiltzeko" agindu ziotela onartzen zuelako Azkorrikoak. Uribe Kostako Amnistiaren Aldeko Mugimenduak, berriz, Goikoetxeak epaiketan bertan bideoari buruz adierazitakoari heldu dio irudi horien baliagarritasuna zalantzan jartzeko. Nabarmendu dutenez, epailearen galderei zer erantzun behar zuen "guardia zibilek esan ziotela" adierazi zuen gazte getxoztarrak. Bestalde, abokatuek aipatutakoari ere heldu dio errepresioaren kontrako mugimenduak. "Gara" egunkariak jasotakoaren arabera, Errioxako irudiak ikusi badira ere, komisariako irudiek "zalantza asko" sortzen dituzte, letraduen esanetan: "Denbora tarte luze askotan ez dakigu non eta zertan ari ziren atxilotuak". Argazkian, Arkaitz Goikoetxea aurreko epaiketa batean / cc-pd Etengabe.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun