Bestetik, gaien aldetik ere, gramatika bat baino gehiago da eta ageri ez diren hainbeste gai ikusten dira SEGen. Batetik, gramatika bat egiteko gramatikariek erabiltzen dituzten materialak bere horretan ematen dira (testuak, hiztegiak, hitzen erabilerak, euskalkien berriak eta abar), eta horiek guztiak modu autonomoan kontsulta daitezke. Bestetik, gramatika batean ageri ez diren gaiak ere ikusi ahal dira: hizkuntzaren jabekuntza, prozesamendua, fonetika eta fonologia, hizkuntzalaritza aplikatua, hizkuntzen arteko kalkoak, zalantzak argitzeko tokiak, eta abar.
SEG osatzen duten material guztiak www.ehu.es/seg helbidean kontsulta daitezke. Hor agertzen dira testu corpusak, hiztegiak eta abar. Etengabe erantsi da materiala, eta urtean hiru-lau aldiz berritu dira aplikazioak. Horiek badute autonomia osoa horrela agertzeko: hiztegi bat zuzenean kontsulta daiteke; hitz bat nola erabiltzen duten idazleek zuzenean kontsulta daiteke. Aldi berean, atal horiek gramatikaren atalak dira eta gramatikaren atal guztiak irekita daude eta gainerakoekin batera ikus daitezke gaurtik aurrera. Hain zuzen ere, hauexek dira atalak: Hiztegia; Morfosintaxia; Euskara eta gizakia; Euskara eta gizartea; Hizkuntzalaritza aplikatua; Fonetika eta Fonologia; Euskararen historia; Zalantzen txokoa.
Atal guztiek ez dute garapen maila bera. Proiektu hau dinamikoa da, eta izaera horrek berak markatzen du: material asko sartu da eta hurrengo urte eta hilabeteetan materiala sartzen segituko dute arduradunek -aste honetan bertan sartu da material berria-, proiektua bizia baita eta, hori dela eta, atal batzuk beste batzuk baino landuagoak daude.
Lanaren originaltasuna
Horrela ba, lanaren originaltasun nagusiena aurkezteko modua da, interneten, eta hori "oso berritzailea da mundu osoan". Barneko edukia aberatsa da, normalean gramatiketan ez baitira horrenbeste gai ageri. Gainera, euskara modernoa jasotzen du, gaur egungoa, Hiztegiaren atalean 2000tik aurrera idatzitako testuak bakarrik hartu baitira kontuan. Urte hori hartu da abiapuntutzat, 2000n Euskaltzaindiak bere "Hiztegi Batua" argitara eman zuelako. Unibertsitateko espezialistarik ezagunenek hartu dute parte gramatikan. EHUk, Eusko Jaurlaritzak -Hezkuntza, Unibertsitate eta Ikerketa Sailaren eta Kultura Sailaren bitartez-, Espainiako Zientzia eta Berrikuntza Ministerioak, Lagun Arok eta Aurten Bai Fundazioak lagundu dute ekimena aurrera eramaten. Hasiera-hasieran Donostiako Udalak eta Gipuzkoako Diputazioak ere eman zuten laguntza.
Euskal Herriko Unibertsitateko (EHU) Euskara Institutuak prestatutako Sareko Euskal Gramatika (SEG) prest dago. Orain hiru urte aurkeztu zen euskal gramatika interneten jartzeko helburua zuen ekimena, eta orain gramatika guztiz berritzaile hau sarean dago erabiltzaile guztien eskura www.ehu.es/seg helbidean. Sareko Euskal Gramatika gaur aurkeztu dute Bilbon, eta ekitaldian izan dira Iñaki Goirizela EHUko errektorea, Isabel Celaa Eusko Jaurlaritzako Hezkuntza, Unibertsitate eta Ikerketa sailburua, Blanca Urgell Eusko Jaurlaritzako Kultura sailburua eta Pello Salaburu EHUko Euskara Institutuko zuzendaria, besteak beste. Sareko Euskal Gramatikak bi berezitasun nabarmen ditu. Alde batetik, internetekoa da, eta beraz, ez du gramatika arruntek duten itxura. Gramatika batean agertzen ez diren hainbeste lanabes erabiltzen da sarean: testuak, argazkiak, irudiak, barneko eta kanpoko estekak (hizkuntza desberdinetan) eta abar, eta lanabes horiek guztiak ageri dira SEGen. Argazkian, 2008ko urriaren 22an ekimena aurrera ateratzeko hitzarmena izenpetu zuten Juan Ignacio Perez Iglesias jarduneko errektoreak eta Lagun Aro aseguru etxeko zuzendari nagusi Pablos Mongelosek, Pello Salaburu lagun zutela / © EHU.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun