Santurtzin egon ondoren, "Pakea Bizkaia" belaontziak Lekeitiorantz egingo du eta bertan egongo da apirilaren 6a arte. Egun horietan zehar, Lekeitioko eskola publikoa eta Resurreccion Maria de Azkue ikastolaren bisitak jasoko ditu. Hitzaldia eta dokumentala kultur etxean izango dira, eta ate irekien jardunaldiak apirilaren 4an eta 5ean izango dira, 17:00etatik 19:00ak arte. Apirilaren 7tik 11ra bitartean, belaontzia Bermeoko portuan egongo da. Bertan, Karmeldar ikastetxeko, San Frantzisko eskola publikoko eta Eleizalde ikastolako ikasleen bisitak jasoko ditu, eta hitzaldiak eta bideo-emanaldiak Arrantzalearen Museoan egingo dira. Ate irekien ordutegia astean zehar 17:00etatik 19:00ak arte izango da, eta asteburuan, 11:00etatik 14:00etara eta 16:00etatik 19:00etara izango da.
Azkenik, Ondarroara helduko da belaontzia, eta bertan egongo da apirilaren 12, 13 eta 14an. Zaldupe, Txomin Agirre eta Zubi Zahar ikastoletako ikasleak hurbilduko dira eta hilaren 12 eta 13ko arratsaldeetan belaontzia irekita egongo da bisitatu nahi duenarentzat. Ondarroan bukatu ostean, belaontzia Algortako bere egoitzara bueltatuko da. Portu guztietan, "Pakea Bizkaia" belaontziaren ondoan karpa bat jarriko da, Unai Basurkoren proiektu berria ezagutu nahi dutenek informazioa jasotzeko. Gainera, aurten egingo duten Groenlandia eta Ternuarako espedizioa aurkezteko aprobetxatuko da. Espedizio berri horretan nabigatzaile ezaguna eta bere tripulatzaileek Euskal Herriko historiaren parte garrantzitsu bat berreskuratuko dute, baleontzi euskaldunek XVI. mendean baleak ehizatzeko egiten zuten itsas-bide berdina jarraituz.
"Pakea Bizkaia" belaontziak kostaldea zeharkatuko du bere hezkuntza-proiektua zabaltzeko
"Pakea Bizkaia" belaontziak Bizkaiko kostaldea zeharkatuko du apirileko lehenengo bi asteetan zehar, hainbat herritan bere hezkuntza-proiektua zabaltzeko helburuarekin. Ibilbide labur horretako geldialdi den portu bakoitzean, Pakea Bizkaia proiektu berriak ingurumenarekiko eta itsasoarekiko duen begirune eta maitasuna helarazi nahi du, baita gure itsasoan dagoen bioaniztasuna zaintzeko beharra ere. Ibilbidea Algortan, Kirol Portuan, hasiko da bihar eta lehenengo geldialdia Santurtzin egingo du belaontziak. Goizean, Eskuzabal, Izar Berria, Abenturazaleak eta Tximista taldeen bisitak jasoko ditu. Halaber, dokumental bat ikusiko dute eta hitzaldi bat jasoko dute Santurtziko Dorre Etxean. Arratsaldean ate irekien jardunaldi bat egingo da, nahi duen jende guztiak belaontzia ezagutzeko. Ordutegia 16:00etatik 19:00ak arte izango da, eta hurrengo egunean 11:00etatik 12:00ak arte. Argazkian, asteazkenean aurkeztu zuen ekimena Unai Basurkok Getxoko Kirol Portuan, Santurtzi, Lekeitio, Bermeo eta Ondarroako alkateekin batera / © Pakea Bizkaia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun