Neskame bat espetxeratzeko agindua eman zuen atzo goizean Getxoko Guardiako Epaitegiak, lan egiten zuen etxeetan bitxiak, dirua eta bestelako ondasunak lapurtu zituelakoan atxilotu ondoren. Eusko Jaurlaritzaren Herrizaingo Sailak jakinarazi duenez, Getxo udalerrriko etxebizitza batean egindako lapurreta baten berri izan zuen Ertzaintzak joan den astean. Jabeek jarritako salaketaren harira, etxe hartako neskameak gertatutakoan parte hartu ote zuen ikertzen hasi ziren. Polizia iturriek gaineratu dutenez, ikerketari esker, bitxien salerosketarako Bilbo eta Getxoko denda ezberdinetan aurkitu zituzten agenteek ustez lapurtuak izan ziren bitxietako batzuk; aipatutako susmagarriak saldu omen zituen guztiak. Atzo arratsaldean, Ertzaintzak ustezko lapurra atxilotu egin zuen lapurreten egilea zelakoan, eta ondasunaren aurkako delitu bat leporatu zioten.
Era berean, Bilboko beste saltoki batean ere bitxiak eta bestelako ondasun batzuk saldu zituela jakin ahal izan da, Herrizaingo Sailaren arabera. Agenteek horiek guztiak eskuratu zituzten legez kanpoko jatorria zutela sumatu ostean. Ertzaintzak dio emakumezkoak aurretiaz lan egin zuen beste bi etxetan ere antzeko lapurretak izan zirela eta berak horietan ere nolabaiteko parte-hartzea izan omen zuela. Izan ere, epaitegiaren bilaketa-agindu bi zituen halako ekintzak egotzita.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun