Leioa eta Erandioko campuseko ikasleen oharra
Apirilaren 7an, Ikasle Topaketak burutuko dira Leioako Campusean. Baina, zertarako Ikasle Topaketak? Bada, norbere arazoak, ikasleriarenak direla ikusteko. Etxetik klasera, klasetik liburutegira, eta liburutegitik berriro etxera goazen bitartean, gure arazoak norbereak soilik direla pentsatzen dugulako. Ikasleok kolektibo bat osatzen dugulako, gizarte honetan zer esan handia dugulako, eta unibertsitatean, are gehiago. Gu gara bertako subjektu nagusia, eta hala ere, hutsaren pare dute gure hitza. Beraz, elkar topatzea, antolatzea, eta arazo indibidualak kolektibo bihurtu eta hauei buelta ematea beharrezkoa dugu.
Dela euskararen egoera, Bolognak sortzen dizkigun buruhausteak, ikas-baldintza prekarioak, unibertsitatearen merkantilizazioa, ikasgai arrotzak, zentsura, kontrol soziala, presentzia poliziala… egunerokotasunean unibertsitatean ditugun gabeziak identifikatu eta hauei aurre egiteko proposamenak eraiki ditzagun. Har dezagun hitza, bota dezagun irrintzia! Ez al dugu bada errutinaren etsipenaz ahituta oihurik bota? Bihurtu dezagun gure oihua irrintzi, ikasleon irrintzia!
Egitaraua
• 11:00etan, harrera ekitaldia (Paraninfoan).
• 11:30ean, ikasle topaketak (eztabaidak fakultateka).
• 13:00etan, ondorioak.
• 14:00etan, itxiera ekitaldia.
• 14:30ean, bertso bazkaria (Mikel Laboa plazan).
• 19:30ean, jaialdia (Bilboko Zazpi Kaleetako 7Katu gaztetxean).
Leioa eta Erandioko campuseko ikasleek topaketa egingo dute etzidamu, ostegunarekin. Ekimeneko antolatzaileek Topatu.info gazte atariari jakinarazi diotenez, jardunaldiaren xedea "norbere arazoak, ikasleriarenak direla ikustea" da. Izan ere, "arazo indibidualak kolektibo bihurtu eta hauei buelta ematea beharrezkotzat" jo dute. Besteak beste, topaketak deitzean egindako diagnostiko laburrean honako arazoak aurreikusi dituzte: "euskararen egoera, Bolognak sortzen dizkigun buruhausteak, ikas-baldintza prekarioak, unibertsitatearen merkantilizazioa, ikasgai arrotzak, zentsura, kontrol soziala, presentzia poliziala". Gauzak horrela, deialdia goizeko 11etan jarri dute, campuseko Paraninfoan. Ondoren, fakultateka eztabaidak izango dira, gerora emaitzak batera jartzeko. 14:30ean, berriz, lana utzi eta gozamena helduko da, bertso bazkaria bitarte. Baina parrandak campusetik Bilboraino eramango ditu ikasleak, Zazpi Kaleetako 7Katu gaztetxeraino, bertan jaialdia ere antolatu baitute. Argazkian, protesta bat campusean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun