Bilboko Portuko Agintaritzarekin batera, fundazioa osatu dute itsasadarreko bi aldeetako zazpi udalek: Barakaldo, Bilbo, Erandio, Leioa, Portugalete, Santurtzi, Sestao eta Zierbena, hurrenez hurren. Aipatu erakundearen helburua da eremu soziokulturalari eta aisialdiari begira egindako interes orokorreko planak eta ekintzak sustatzea eta garatzea. "Horien bidez, aukera egongo da itsasertzeko udalerrien garapen ekonomikoan eta sozialean eta horien integrazioan Bilboko portuak eta itsasadarrak gaur egun eta historian zehar izan duten garrantzia hobeto ezagutzeko", azaldu dutenez. Laster Getxoko Udala ere sartzea espero da. Fundazioaren hasierako hornidura 100.000 eurokoa da. Kopuru horren %49 Bilboko Portuko Agintaritzak emango du, eta, gainerakoa, Bilboko itsasadarraren inguruko udalerriek. Argazkian, Bilboko Portuko Agintaritzaren egoitzan, Olabarri jauregian, egin zuten fundazioa osatzeko ekitaldia, joan den ostiralean / © Leioa.net.
Ondokoak dira Bilboko Portua eta Itsasadarra Fundazioaren helburuak: ikerketa-lerroak garatzea eta sustatzea; mintegiak, sektorekako topaketak eta trebakuntza ikastaroak antolatzea eta gauzatzea portuaren eta udalerrien bizitzan parte hartzen duten sektoreetan; portuko gaietan trebatzeko bekak eta laguntzak ematea; portuko zerbitzuei buruzko azterketa-proiektuak egitea; azoka, mintegi eta bestelako foroetan parte hartzea; arlo sozialean, kulturalean eta kirol-arloan egiten diren jarduerekin bat egitea eta halakoak babestea; sektoreko administrazioen, erakundeen eta/edo agenteen arteko lankidetza sustatzea; eta inguruan dauden irabazi asmorik gabeko gainerako erakundeekin lankidetzan aritzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun