Aurten ere Bizarra Lepoan euskara elkarteak toponimia ibilaldiak prestatu ditu, Getxoko Udaleko Euskara Zerbitzuarekin batera. Apirilean hasita, udalerri osoa hartzen duten lau ibilbide diseinatu dituzte, tokiko ondare etnografikoa eta toponimia hobeto ezagutzeko. Helburua, herriko toponimia eta inguruotako arkitektura, paisaia, fauna, flora, ondare arkeologikoak, lanbideak eta ondarea orokorrean ezagutzera ematea da. Txangoak euskaraz izango dira baina, "ohi bezala, joaten den edonork ez du arazorik izango azalpenak ulertzeko", joan den ostiralean Koldo Iturbe zinegotziak adierazi zuenez. Hiru ordu inguruko ibilaldi lasaia izatea aurreikusten da, eta toponimiaz gain, herriko historia, geologia eta biologiari buruz gehiago jakiteko aukera eskainiko du. Lehenengo saioa larunbat honetan izango da, goizeko bederatzietatik aurrera, Algortako Portu Zaharreko Etxetxun hasita. San Nikolas, Jenaratxu, Usategi, Kantarepe, Portu Zaharra eta Talaietatik igarota, Aixerrotan amaituko dute. Ibilbideak hilean bi larunbatetan izango dira, ekainera arte. Horren gaineko informazio gehiago eskatzeko eta izena emateko, 688 635 350 telefono zenbakira deitu edo getxo.toponimia[abildua]gmail.com helbidera idatz daiteke. Argazkian, Algortako Portu Zaharra / © Getxo.net.
"Getxoko kontuei buruzko oinarrizko ezagutza azaldu eta zabaldu nahi da", azaldu zuen ostiralean Koldo Iturbe Getxoko Udaleko Euskara zinegotziak. Ildo horretan, besteak beste, oso toponimoa argia eta berria izateagatik nahiko ezaguna den Areeta izenaren esanahia zehaztuko da, baita hain zabalduta ez dauden Algorta edo Getxori buruzko oinarrizko informazioak ere. Koldo Mitxelenaren esanetan, Algorta (H)ar(rizko)+ Korta litzateke eta ez Ardi+korta maiz pentsatu den moduan eta Getxo dorretxea, gaur egungo Jauregi baserritik 20 metrora zegoen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun