Sekeko gaztetxeak larunbat honetan, apirilak 9, ospatuko du lehenengo urteurrena. Gauzak horrela, egun horretarako, ekitaldi ugari antolatu ditu udaletxeko plazan Gazte Asanblada Sopeloztarrak (GAS). Goizeko 11etatik aurrera, umeentzako puzgarriak eta jolasak izango dira; baita gaztetxearen argazki erakusketa ere. Eguerdian, berriz, graffiti erakusketa eta tailerra egingo dituzte; eta ordu bete beranduago, 13:00etan, herri kirolak. Bazkaltzeko ordua arratsaldeko hiruretan jarri dute. Horretarako txartelak salgai daude jada, Plaza Beltza herri kultur-gunean (17:30-20:30) eta Sekekon, 8 eurotan. Erosteko epea ostegunera arte jarri dute. Hala ere, txartela lehenbailehen eskuratzeko gomendioa luzatu du GASek. Argazkia: © Gazte Asanblada Sopeloztarra.
Bazkalosteko egitarauari dagokionez, 17:00etan, "Koblakari" zirku kabareta izango da. 18:30ean, berriz, kontzertu mugikorra egingo dute, Segoviako Ihesa taldearen eskutik. Ekitaldia egin eta gaztetxearen abestia aurkezteko ordua 20:00etan jarri dute. Azkenik, 21:00etatik aurrera, El Trono de Judas eta Bad Sound System taldeek eskainiko dute kontzertua.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun