Ekitaldiekin jarraituz, larunbaterako Korrika afaria antolatu dute Erandion. Berbots euskara taldeak aipatu duenez, ez da txartel askorik geratzen. Beraz, joan nahi duena La Plaza, Primera Linea, Elordui, Dandaka edo Goikolandako tabernara gerturatu beharko da, ahalik eta lasterren. Azkenik, igande eguerdian Korrikaren aldeko diru bilketa egingo dute Altzagan. Hitzordua 12:00etan jarri dute Jado kalean.
Biharko hasiera ekitaldiari dagokionez, Trebiñu herriko plazan, elizaren ondoan, izango da 17:00etan. Asier Amondo AEKren Arabako Artezkaritzako kideak eta Edurne Brouard Korrika 17ren arduradunak hartuko dute hitza. Txalaparta doinuen ostean, Argantzungo abesbatzaren saioa etorriko da, eta Manex Agirre Arabako Bertsolari Txapelketako irabazle izendatu berriaren bertsoa eta dantzarien aurreskua. Kale animazioa eta umeen txokoa ere ez dira faltako hasiera eguneko jaian. Trebiñuarrek lan handia egin dutenez 17. Korrika prestatzen, AEKko arduradunek ohoratu egin nahi izan dituzte, eta, herritarren ordezkari moduan, lehen kilometroa Gutxisolo euskara elkarteak egingo du. Trebiñu herritik 17:30ean abiatuko da Korrika. Argantzun aldera joango da, eta hara 18:30ean helduko da. Lehenago, 18:00etan, Añastron sartuko da. Gero, berriro emango du buelta Trebiñurantz. Hasiera ekitaldia Trebiñu herrian izango bada ere, jaiak Argantzunen izango du segida. Beste herri horretan, 19:00etatik aurrera, kontzertuak egongo dira, Aske, Herrikada, Gose eta Betagarri taldeekin.
Apirilaren 16rako Uribe Kosta eta Erandioko Korrika ordutegiak:
• 08:23:00, Erandio Landa
• 08:52:28, Erandio
• 09:38:37, Leioa
• 10:11:07, Itzubaltzeta / Romo eta Areeta
• 10:37:46, Algorta eta Getxo
• 11:25:25, Berango
• 11:39:43, Sopela
• 12:10:55, Urduliz
• 12:27:10, Plentzia
• 12:38:13, Barrika
• 12:59:40, Gorliz
• 13:25:40, Lemoiz
"Maitatu, ikasi, ari... euskalakari" lelopean, bihar, osteguna, abiatuko da Korrikaren 17. edizioa Trebiñutik. Apirilaren 17an Donostiara heldu artean bi mila kilometro baino gehiago egingo ditu Euskal Herrian barrena euskararen aldeko lasterketak. Eskualdeari dagokionez, apirilaren 16an erandioztarrek hartutako lekukoa goizez (ikusi ordutegiak, pdf), Leioatik sartuko da eta hortik aurrera, Getxo udalerria, Berango, Sopela, Urduliz, Plentzia, Barrika, Gorliz eta Lemoiz zeharkatuko dituzte "euskalakariek", AEKko kideek euskarari zaletasunaz gain erabilera ere eskaintzen diotenentzat sortu duten hitz berria. Hamaika egun horietan eta bereziki Donostiako jaian Euskaltzaindia izango da omendua. Hala ere, Korrikaren hasierak Uribe Kosta eta Erandion ere izango du oihartzuna. Besteak beste, bihar, Altzagan barrena ibiliko da Kantagunea. 19:30ean abiatuko dira La Plaza tabernatik eta Korrikarako petoak ere salduko dituzte. Itzubaltzeta / Romon, berriz, bertsomagia saioa eskainiko dute Tor magoak eta Fredi Paya eta Etxahun Lekue bertsolariek. Ekitaldia 20:00etan izango da, Anaiak tabernan, "Billares" gisa ezagunagoa. Argazkian, Korrika Itzubaltzetan barrena duela bi urte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun