Euren kasa moldatu ezin zuten 91 laguni etxez etxeko laguntza eman zien iaz Leioako Udalak
Leioako Udalaren Etxez Etxeko zerbitzuak 84 etxebizitzetan lan egin zuen joan den urtean. Orotara, 91 pertsonei arreta egin zien, horietatik 67 emakumeei eta 24 gizonei, tokiko iturriek zehaztu dutenez. Lagunduz enpresak egindako txostenaren arabera, 31.935 ordu arrunt izan ziren zerbitzu horrek lan egindakoak, eta 63 berezi. Erabiltzaileen profilean gora behera asko ematen dira urtean zehar, udal arduradunek diotenez. Hori horrela izanik, iaz 10 alta izan ziren eta 14 baja. "Azken horiek erabiltzaileak erresidentzietara joaten direlako edo hiltzen direlako ematen dira gehienbat", azaldu dutenez. Dena dela, 15 etxeetan emandako zerbitzua indartu egin zen iaz. Datu horiek mantentzeko edo hobetzeko asmoz Leioako Udalak hainbat hobekuntza egingo ditu, zerbitzu horren kalitatea handitzeko. 820.000 euroko aurrekontuarekin, gaur egun ematen diren zerbitzuak mantenduko ditu, baina beste batzuk indartuko ditu, adibidez: prestakuntza eta botiken dosifikazio pertsonalizatuaren sistema, garabiak edota mota horretako aparatuetan oinarritutako laguntza teknikoa (6.000 euro urtean), urtero 30 orduko medikura joateko laguntza (ordutegiaz kanpo), garbiketa lanak... Argazkia: © Leioa.net.
Bestalde, Udalak beste zerbitzu bi eskaini zizkien iaz erabiltzaileei: alde batetik, suteen kontrako alarmak, gaur egun 69 etxeetan jarrita daudenak. Eta bestetik, telelaguntza, egun 150 alta dituena. Zerbitzu guzti horien bitartez, arreta zuzena eskaintzen zaie doan bakarrik edota familian bizi diren herriko nagusiei. Beraien etxeetan denbora luzeagoz bizi ahal izatea ahalbidetzen zaie, bizi kalitatea hobetuz. 2011n ere Lagunduz izango da horretaz arduratuko den enpresa, zerbitzu guzti horiek leioaztarrei dohainik eskaintzeko eta kudeatzeko. "Horretaz gain, Lagunduz enpresak egiten dituen kontratazioak diskriminazio baikorra sustatzen dutela esan dezakegu, udalerriko enplegu zentroekin elkarlanean eta gizarteratze lanak egiten dituzten erakundeekin hitzarmenak sinatuz", amaitu dute udal arduradunek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun