Leioako Kaleko Artisten Azokak bere burua aurkeztu zuen herenegun, asteartea, Ciudad Realgo Puertollano eta Almodovar del Campo herrietan egunotan ospatzen ari den Gaztela-Mantxako Antzerki Azokaren barruan. Hilaren 4tik 6ra bitartean egin duten jaialdiaren egitarauan Arte Eszenikoetako laurehun profesionaletatik gorak parte hartu dute. Ana Lopez Leioako Udaleko Kultura eta Gazteria Saileko zuzendaria izan zen Umore Azokaren hamabigarren edizioko egitaraua ezagutzera ematearen ardura hartu zuena. Aurten aurkeztuko diren ikuskizunen artean %40ak estreinaldia izango du Leioan, azpimarratu zuenez. Eta beraz, "aurtengo afixak agertzen duen harridura sortzea" espero dute antolatzaileek, bertaratuko diren "profesional eta ikus-entzuleengan". Horretaz gain, profesionalak Umore Azokan izena ematera ere gonbidatu zituen, bihar, ostirala, irekitzen baita horretarako aukera. Izen emateak Leioako azokaren atarian bertan egin daitezke: www.umoreazoka.org. Argazkia: © Umore Azoka-Borja Relaño.
Leioako Umore Azokarekin batera, ekitaldian Lleidako Fira de Titelles eta Portugaleko Formas de Tavirako jaialdiak ere izan ziren, bakoitza bere egitaraua aurkezten, baita Espainiako Arte Eszenikoen Azoken Koordinadorako (COFAE) partaideak ere. Azken hauek iragarri zutenez, Deustuko Unibertsitateak egin eta azokek uzten duten aztarna ekonomikoa ikertzen duen txostena eskegiko dute www.cofae.net atarian. Aipatu txostenean, erakunde publikoek azoketan inbertitzen duten euro bakoitza arte eszenikoen sektorean zazpigatik biderkatzen dela nabarmentzen da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun