Getxo Kirolak erakundeak 1.700 leku baino gehiago eskainiko ditu udako ikastaroetan
Getxo Kirolak erakundeak 1.700 toki baino gehiago eskainiko ditu uztailean eta abuztuan, bazkideentzat antolatuko dituen ikastaroetan. Programazioan sartuta daude xendazaletasun eta abenturako ikastaroak, tenisa, padela, haurrentzako kirol-jarduerak eta igeriketa, udal iturriek zehaztu dutenez. Denboraldi honetan, lehenengoz, Kirolet@n izeneko ikastaroa egingo dute abuztuan, nerabeek kirola egitea sustatzeko asmoz. Ikastaro horrek barne hartuko ditu, besteak beste, batuka, surfa, tirolina eta skate eskolak. Aurreko urteetan bezala, izena emateko hurrenkera zozketa bidez erabakiko da. Hori dela eta, maiatzaren 13ra arte, familia bakoitzak zenbaki bat jaso ahal izango du Algortako Fadura edo Itzubaltzeta / Romoko Gobela kiroldegiko bulegoetan, maiatzaren 17an goizeko hamarretan Faduran jendaurrean egingo duten zozketarako. Argazkian, hainbat lagun tenisean Gobelan / © Getxo.net.
Zerrendak Getxo Kirolak erakundearen web-orrian (http://getxokirolak.getxo.net) eta Fadura eta Gobela kiroldegietako iragarki-tauletan jarriko dira maiatzaren 17an bertan, eguerdiko 12:00etan. Zerrenda horietan argitaratuko da zenbaki bakoitzari izena emateko esleitu zaizkion eguna eta ordua. Izen-emateak Faduran hasiko dira maiatzaren 24an. Horretarako epe ofiziala amaitu ondoren, Faduran eta Gobelan jendeari arreta emateko bulegoek libre geratu diren plazei, aldaketei, itxaron-zerrendei eta abarri buruzko kontsultei erantzungo diete. Azkenik, tokiko arduradunek adierazi dute tenis, padel eta igeriketako hastapen ikastaroa baino maila altuagoetan beharrezkoa izango dela izena ematen den egunean maila hori egiaztatzea. Horretarako, proba bat egin beharko da, aldez aurretik, kirol arloko teknikariekin.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun