Plentzia ta Gorlizko Gazte Asanbladaren oharra:
Orain dela hiru hilabete Plentzia eta Gorlizko Gazte Asanbladak gaztetxe baten faltan eta, beste bide batzuk jorratu ostean, kristoko ermitaren atzeko aldean, Antolin Deuna Plazatxoan hain zuzen ere, kokatuta dagoen etxea okupatu genuen. Ongi bagenekien bidea ez zela erraza izango eta zaila izango zela ailegatzea etxeko jabeekin akordioetara ikusita jendartearen artean okupazioak daukan kriminalizazio maila. Beraz, burujabetasun osoz gure gain hartzen genuen okupazioak ekar zitekeen ondorio legalak.
Hiru hilabete motz baina luze hauetan ezegonkortasun legalak dakarren ondorioei aurre eginez gaztetxean edo gaztetxetik herrira hamaika ekimen antolatu ditugu. Besteak beste, feminismoaren inguruko tailerrak, auzo lanak, jaiei begira koadrilak bertan batzartu dira, kantautoreak, autodefentsa tailerrak edo hirugarren inauteri tematikoak... Oztopoak oztopo eta gure akatsekin gazteok antolakuntzaz eta autogestioaz espazio bat aurrera eramateko gai garela erakutsi dugu. Horretaz gain, Ermitatze gaztetxea herrian hautsak harrotu ditu, hainbat izan dira entzundako iritziak, hainbat esparruetan sortutako eztabaidak, baita eragile politiko desberdinak guri adierazitako iritziak ere.
Ermitatze gaztetxean identifikatutako zazpi gazteak epaituko dituzte ostegunean
Hilaren 14an, ostegunean, joan den urtarrilaren 7an Plentziako Ermitatze gaztetxean identifikatutako zazpi neska-mutilak epaituko dituzte Getxoko Justizia Jauregian. Lau egun geroago aurkeztu behar izan ziren epaitegian, baina ezin izan zuten deklaratu, sare informatikoan matxura zelakoan. Tokiko gazteek adierazi dutenez, "ziur aski, horren ostean epaileak gaztetxetik aterarazteko agindua emango du". Arrisku horren aurrean, Plentzia ta Gorlizko Gazte Asanbladak hainbat mobilizazio deitu ditu hurrengo egunetarako. Gaur bertan, arratsaldeko zazpietan, Euskaraokea eta, ondoren, musikaz girotutako gau olinpiadak egingo dituzte Plentziako udaletxearen aurrean. Hurrengo ekimena hilaren 14an, ostegunean, egingo dute. Goizean geldialdia egiteko deia luzatu dute Plentziako Uribe Kosta institutuan eta, ondoren, kontzentrazioa burutuko dute herriko udaletxearen aurrean. Hurrengo egunean, berriz, 19:30ean balizko desalojoaren aurkako manifestazioa egingo dute Pirulitik hasita. Argazkian, Ermitatze gaztetxea / © Plentzia eta Gorlizko ezker abertzalea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun