Atzo goizaldean, Ertzaintzak 26 urteko gizon bat atxilotu zuen Algortan, kotxe batetik praka eta diru-zorro bana ostu zituelakoan, Eusko Jaurlaritzako Herrizaingo Sailak adierazi duenez. Dirudienez, bikote bat autoaren atzeko eserlekuetan zegoela, aurreko atea zabaldu eta praka bat zein dirua eta dokumentazioa zeramatzan diru-zorroa eraman zituen ustezko lapurrak. Aurreko beste ebasketa batzuetan izandako antzekotasunak direla eta, ikerlariek azken hilabeteetan toki berdinean izandako beste lau delitu egotzi dizkiote gazteari.
Igandeko goizeko laurak aldera, Ertzaintzak Algortako Portu Zaharreko aparkalekuan jazotako ustezko ebasketa baten berri izan zuen. Dirudienez, lapurrak Usategi parkerako bidea hartu zuen. Horrezkero, Ertzaintzako patruila bat lapurreta izandako tokira bertaratu zen, beste bat aipatu parkera zihoan bitartean. Bertan, ertzainek bi kanpin-denda txiki altxatuta zeudela ikusi eta, horietako baten ondoan larru beltzeko diru-zorro bat zegoela ikustean, jabea biktimak emandako deskribapenarekin bat egiten zuela ikusi eta identifikatu egin zuten. Ustezko lapurra 26 urteko gizonezkoa da eta beharrezko egiaztapenak egin ostean, poliziek atxilo eraman zuten ebasketa delitua egotzita. Ertzaintzako ikerlariek azken hilabeteetan toki berdinean izandako antzeko beste lau ebasketa leporatu dizkiote gazteari.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun