Bitarteko teknikoak gehiagora joan dira beti. Hoberako eboluzioa izan da zuzendariak 70eko hamarkadan antzezpena abiatu zuenetik: "Antzezkizun txikitxoa eskaini genuen lehenengo urtean, baina arrakasta eta ikusleen irrika ikusita, gidoian, eszenografian eta bitarteko teknikoetan aldaketan eginez joan gara etengabe". Ikusgarritasun zinematografiko, plastika eta kolore efektu politen aldeko apustua egin du beti Berangoko Pasioak. Fokuen artean kanoiak jarriz indartu zuten argiztapena; soinua digitalizatu eta aurrez programatu zuten, publikoak detailerik ez galtzeko; tamaina handiko eszenatokiek erakargarritasuna eman zioten muntaiari; eta urtero ukituak ematen zizkioten jantzien detailerik txikienari.
31. edizioak, ordea, itxaron beharko du. "Ez dakit nahikorik balioetsi den errepresentazioa. Aurten jakingo dugu jendeak aurrera egin nahi duen", iradoki du Ansoleagak; "Berangorako galera kultur handia" izango dela gaineratzearekin batera. Zuzendariaren hitzetan, udal laguntzak hobekien zeuden unean heldu da lapsusa: "Batez ere oraingo alkatearekin, dirua eta laguntza emanez oso ondo portatu da Udala. Inoiz ez dugu horrenbesteko laguntza eta erraztasunik izan, Anabel Landa iritsi arte". Ikuskizunaren arduradunaren arabera, "diru-laguntzak ondo zeuden; horietatik batzuk mamitsuak ziren. Kontua da jenderik ez daukagula".
Ezustekorik ez
Hala ere, Ansoleagak bazekien zer gertatu behar zuen: "Aspalditik ikusten nuen, baita ohartarazi ere. Azkenengo bost urtetan nabari izan dugu. Argi zegoen gertatuko zela". Bere ustez, "azken hiru hamarkadetan asko aldatu da gizartea eta boluntariotza azpitik dago. Kontuan hartu behar da Pasioa egiteak hilabete asko eskatzen dituela entseatzen, dekoratuak prestatzen, jantziak egiten... Urritik apirilera lan eta lan". Ansoleagarentzat tristea da honaino heldu behar izana: "Izugarrizko pena ematen dit. Kontuan hartu nik sortu dudala eta 30 urte direla jada", amaitu du.
"Aurten ez da Pasiorik egongo. Horrek ez du esan nahi etorkizun batean ez denik izango, beti ere arazoak konpontzen badira", aipatu du penaturik Fernando Ansoleaga. Bizkaian gauez egiten den antzezpen bakarraren zuzendariak badaki 250 lagun behar dituela, muntaia aurrera ateratzeko. Boluntarioen faltak geldialdia eragin du 31. edizioan. "Ez dago jende nahikorik antzeztu, muntaketa lanak egin eta ordena mantentzeko. Ez da belaunaldien arteko erreleborik egon. Gero eta gutxiago ginen", esan du Ansoleagak. Aspalditik ikusten zen geldialdia izango zela. Iaz paper bat baino gehiago interpretatu behar izan zuten hainbat aktorek. Izaera erlijioso eta kulturaleko aipatu ekitaldiak kalitate apur bat ere galtzearen aurka agertu da urtetik urtera horren sustatzaile izan dena. "Muga oso goian jarri dugu. Maila jaistea baino hobeagoa da horrela utzi eta itxarotea", ziurtatu du Ansoleagak. Argazkian, Berangoko Jesusen Pasio Bizia artxiboko irudian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun