Prentsaurrekoan zabaldutako oharra:
PSOE-PP biolentzia gehiagorik ez!
Astelehena, apirilak 4, arratsaldeko 8:30ak inguru; Jon Etxegarai eta Gabi Basañez sopeloztarrei agurra emateko prest, Sopelako erdiguneko kale bat jendez gainezka zegoen. Hainbat hilabete "modu prebentiboan" kartzelan eman ondoren eta epaiketaren zain daudelarik, herriak zeuden. Baina ospakizuna arratsalde iluna bilakatu zen. Trajea bezain beltza eta kaskoa bezain gorria izan zen bertara hurbildutako ertzainen jarrera. Urduritasuna, tentsioa eta beldurra areagotuz haien esku-hartzearen ondorioak hurrengoak ditugu: hainbat zauritu, ospitalera joan behar izan zutenak, kolpatuak, mehatxuak, lau pertsona identifikatuak. Hori al da ongi etorri pribatu bati dagokion erantzun proportzionala?
Garaiak aldatuz doaz, jarrerak eta aurrera begira ditugun itxaropenak ere. Baina, badirudi zenbaitzuek hau zapuzteko agindu argiak dituztela. Sopelako Gernikako Akordioko sinatzaileok inolako indarkeriarik gabeko egoera nahi dugu. Horretarako, bermatuko dituen baldintzak errespetatuak izan daitezen exijituz. Modu horretan bakarrik lortuko baitugu normalizazio politikorako bidean aurrera egitea.
Sopelan ere ideologia politikoa aitzakiatzat hartuz mehatxatuak eta kolpatuak izateko arrisku argia dagoenez, gatazkaren konponbide demokratikoa aldarrikatzen dugu. Testuinguru horretan, apirilak 14, ostegunean burutuko den pleno eta manifestaziorako deialdia luzatzen diogu herritar orori: arratsaldeko zortzietan Sopelako udaletxeko plazan guztiok elkar gaitezen.
Bake bidean aterabide demokratikoa orain!
Argazki guztiak ikusi:
Ertzaintzaren oldarraldiaren kontrako manifestazioa egingo dute bihar Sopelan
2011ko api. 13a, 11:54
Gernikako Akordioaren Sopelako sinatzaileek prentsaurrekoa (mp3) eskaini zuten atzo, asteartea, hilaren 4an Ertzaintzak agertutako "bortizkeria" salatzeko asmoz. Gabi Basañez eta Ion Etxegarairi egiten ari zitzaizkien harreran, hainbat lagun zauritu eta lau pertsona identifikatu zituzten poliziek. Adierazi zutenez, "badirudi baten batzuek aurrera begira ditugun itxaropenak zapuzteko agindu argiak dituztela". Horren aurrean, "inolako indarkeriarik gabeko egoera" nahi dutela berretsi dute Gernikako Akordioaren Sopelako sinatzaileek; baita hori bermatuko duten baldintzak "errespetatuak izan daitezela" exijitu ere. "Modu horretan bakarrik lortuko baitugu normalizazio politikorako bidean aurrera egitea", gaineratu dutenez. Hori dela eta, bihar, osteguna, izango diren udal batzar eta manifestaziora joateko deia luzatu diete herritarrei. Martxa iluntzeko zortzietan abiatuko da udaletxeko plazatik, "PSOE-PP biolentzia gehiagorik ez!" eta "Bake bidean aterabide demokratikoa orain!" leloak erabilita. Argazkian, zaurituetako bat / © Sopela.net.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun