Rafal Jezierski biolontxelo-jotzaile poloniarrak Juilliard School musika eskola ospetsuan ikasi zuen eta Miroslav Rostropovich musikari handiaren maisu-eskoletako ikasle izan da. Gaur egun, Valentziako Orkestrako instrumentista da eta, horrez gain, zenbait ganbera-talderekin aritzen da. Bestalde, Nieves Pascualek Valentziako Goi-Kontserbatorioan ikasi zuen eta hainbat sari irabazi ditu; horien artean, Alemaniako Jugend Musiziert Nazioarteko Lehiaketaren lehenengo saria nabarmentzen da. Areetan, Lili Boulanger, Consuelo Diez, Louise Adolpha Le Beau, Alicia Coduras, Dolores Serrano Cueto, Magaly Ruiz eta Encarna Beltran-Huertas musikagileen piezak joko dituzte bi musikariek; azken hiru konpositoreen lanak erabateko estreinaldiak izango dira.
"Emakumea eta pianoa"
Bestalde, igandean, eguneko programa arratsaldeko seietan hasiko da, "Emakumea eta pianoa" mahai-inguruarekin. Bertan, emakumezko konpositoreek eta artistek parte hartuko dute. Jarraian, 20:00etan, Elena de Santos pianistaren saioa hasiko da. Musikagile espainiarren piezak estreinatu ditu De Santosek, eta RNE, TVE eta Alemaniako telebistentzako grabazioak egin ditu. Gaur egun, Nuevo Ensemble de Segovia taldean ari da, eta Madrilgo Teresa Berganza Kontserbatorioko irakaslea da. Igandeko kontzertuan Maria Dolores Malumbres, Cecile Chaminade, Anna Boffill, Clara Schumann, Mariona Vila eta Maria Luisa Ozaita konpositoreen piezak interpretatuko ditu, besteak beste.
Emakumeak Musikan jaialdiaren 11. edizioa izango da asteburu honetan Areetako Andres Isasi Musika Eskolan. Emakumeak Musikan elkarteak Getxoko Kultur Etxearen laguntzarekin antolatuta, ekimenak emakumezkoen musika-konposizioak zabaltzea eta bultzatzea du helburu. Horrela, antolatzaileek adierazi dutenez, larunbatean, Rafal Jezierski biolontxelo-jotzaileak eta Nieves Pascual pianistak osatutako bikotea arituko da, eta igandean, Elena de Santosek piano-errezitaldia eskainiko du. Halaber, igandean mahai-inguru bat egongo da 18:00etan. Saio guztiak 20:00etan hasiko dira eta kontzertuetarako gonbidapenak Getxoko Kultur Etxean eta Areetako Musika Eskolan jaso daitezke dohainik. Emakumeak Musikan elkarteak errezitaldiak eta hitzaldiak eskaintzen ditu historiako zenbait garaitako emakumeen musika ezagutzera emateko. Horrez gain, emakumez osatutako iraganeko eta gaurko musika ikertu eta katalogatzen ditu, besteak beste. Argazkia: © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun