Ate joka dugu ja Korrika

Erabiltzailearen aurpegia Ukberri 2011ko api. 15a, 19:14

Egun bakarra falta da Korrika Uribe Kosta eta Erandiora heltzeko. Izan ere bihar goizeko 8:23an Arlaneko langileek hartuko dute lekukoa Asua plazan. Handik aurrera, 71 kilometro (xehetasunak behean), 5 ordu eta 28 minututan egingo ditu euskararen lasterketak eskualdean zehar, Maruri-Jatabetik Donostiarako bidea hartu baino lehen. Azken urteotan bezala, euskaltzaleak, ikasleak, ikasleen gurasoak, langileak, tabernariak, dantzariak, presoen lagunak, ezker abertzalekoak, jeltzaleak, independenteak, jai batzordeak, kirolzaleak, gazteak… eta abar luze bat txandakatuko dira lekukoa eskuan bilduz. Dena den, aipagarriak izango dira hainbat kilometro. Esate baterako, Txirrindularien Elkarteko 700 kidek bizikleta gainean hartuko dute lekukoa Erandioko udaletxetik Cables y Alambres lantegiraino. Barrikan, berriz, kanoaz gurutzatuko dute itsasadarra. Itzubaltzeta / Romon, ordea, Joseba Kanpo eta Urtsa Errasti Korrikako sortzaileetako bik eramango dute lekukoa, AEKren urteotako tradizioari eutsiz. Tartean, guztiaren berri emango du Koska irratiak, goizeko 10etan abiatuko duen saio berezian. Argazkian, Korrika Txikia egin dute gaur goizean eskualdeko ikastetxe gehienak.

Baina Korrika heldu artean, eta ondoren ere bai, hainbat ekitaldi izango dira gurean. Gaur bertan, ikastetxeetako neska-mutilek hartu dituzte herri ezberdinetako kaleak, Korrika Txikia egiteko. Hala ere, arratsaldean ere ez da ekitaldirik faltako. Besteak beste, Plentzian, triki-poteoa egingo dute, 19:00etan Eleiz plazatik abiatuta eta Leioan Bertsoz Blai ekitaldia egingo dute Ganeko tabernan, iluntzeko zortzietatik aurrera.

Uribe Kosta eta Erandioko ordutegia:



Larunbateko ekimenak

Baina bihar izango da ospakizunen eguna. Herri bakoitzetik Korrika igarota, poztasuna mantentzeko eta indarrak berreskuratzeko unea izango baita. Horrela, Algortan, Telletxe plazan egingo dute jaialdia 11etatik aurrera, besteak beste umeentzako birziklatze fabrika, herri bazkaria eta erromeria izango direla. Astrabuduan eta Altzagan, txokolatadak izango dira lasterketa joan da gero. Gorlizen, Korrika bazkaria izango dute. Leioan jaia 10:30ean hasiko da, txokolatada, umeentzako jolasak, triku-kantu-poteoa, herri bazkaria eta erromeria izango dituztela aukeran. Plentzian, 10:30ean Surf Rider Fundazioaren tailerrak burutuko dituzte. Sopelan, ordea, haur parkea goizean eta erromeria 6etan. Urdulizen, azkenik, "Baso sorgindua" ume antzerkia ikusi ahal izango da ordubatan.

Algorta
Telletxe plazan.

11:00 Txorimalo gaztetxearen V. Tortilla Txapelketa.
12:30 Umeentzako birziklatze fabrika.
14:30 Herri bazkaria: paella erraldoia.
18:30 Erromeria Luhartz taldearekin.
Gura duena kalejira gaztetxeraino.
19:00 Kontzertuak: Baltzak, Kop eta erromeria Txorimalo gaztetxean.

Erandio

Pasatutakoan, Astrabuduan, txokolatada Mendiguren plazan eta Altzagako Gautxorin.
15:00 Korrikaren aldeko otzara zozketa Xixili eta Primera Linea tabernetan.

Gorliz

14:00 Korrika bazkaria Arriolane garagardotegian.

Leioa
Udaletxeko plazan.

10:30 Txokolatada.
11:00 Umeentzako tailerrak eta jolasak.
12:30 Triki-kantu poteoa. Plazatik plazara (Euskal etxeen plaza / Plaza Gorria / Tigre plaza / Errekalde plaza / Udaletxeko plaza).
14:30 Herri bazkaria.
18:30 Erromeria Lotxo taldearekin.

Plentzia
Jai Alai aurrean.

10:30 Surfrider Fundazioaren tailerrak.

Sopela
Udaletxeko plazan.

12:00 Haurrentzako parkea.
18:00 Patxi eta Konpainiaren erromeria.

Urduliz

13:00 "Baso sorgindua" umeentzako antzerkia, kultur etxean. Sarrera doan.

Igandeko azken jaia

Igandean, euskalakariz betetako bost autobus irtengo dira eskualdetik Korrikaren azken jaira joateko. Donostian, besteak beste, Korrikari helmugan harrera egin, lekukoaren aurtengo mezua irakurri, Gose, Esne Beltza eta Ze Esatek! taldeak entzun, bertsolariak ikusi, herri bazkariaz, txahal erreaz eta sagardotegiaz gozatu eta milaka euskalakariz lagunduta parranda botatzeko aukera izango da.
Kultura
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun