Bertso asko eta bertso ale on batzuk izan ziren finalean zehar. Besteak beste, hona hemen Gaztetxoen kategorian Imanol Uriak puntuari erantzunez horrela eraiki zuen bertsoa:
Euskalakari asko
jabilkuz korrika,
ta ezin gara egon
sofan jesarrita.
Igandean Donostin
badaukagu zita,
herria euskalduntzeko
gugandik hasita.
Argibide gehiagorako irakurri Bizkaie.biz-en Gorka Intxaurbek idatzitako kronika.
Ipar Uribeko bertsolari gazteek seigarrenez eskuratu dute garaipena Bertsolari Gazteen BBK Sariketan. Pasa den ostegunean jokatu zen finala Bilboko Kafe Antzokian eta aurreko bi urteotan bezala, 19. edizioko finalistak Lea Artibaiko gazteak eta Ipar Uribe ordezkatzen zuten Algortako Bertsolari Eskolako neska-mutilak izan ziren. Gauzak horrela, Inaxio, Beñat eta Peru Vidal, Maialen Markaida, Imanol Uria eta Arrate Illaro indartsu agertu ziren emozioz beteriko saioan, errebantxa usainean. Arrate, Peru eta Beñatek Lea Artibaikoek baino puntu erdi gutxiago erdietsita, Maialen, Inaxio eta Imanolek lortutako puntuei esker lortu zuten garaipena, 410 eta 390. Hortaz, sariketaren historian berdinketa bikoitza eman da. Alde batetik, osteguneko finalistek seina aldiz jaso dituzte garaikurrak. Beste aldetik, haien arteko finaletan bina irabazi dituzte. Bestalde, Bizkaiera egokienaren saria Arratiako Illart Gumuziok eskuratu zuen. Finalista gazteenarena berriz, Aissa Intxausti lekeitiarrak. Argazkian, Peru Vidal kantari / © BBK.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun