Getxoko alkateak "oso ondo" baloratu du Barcelo enpresak agertutako "borondatea". Halaber, elkarrekin lan egiten jarraitzeko konpromisoa helarazi dio hotel-enpresari, “aplikazio-araudiari zor zaion erabateko errespetutik abiatuta, galeriak zaharberritzea eta Getxoko herriarentzat lanpostuak sortuko dituen jarduera ekonomikoa, Punta Begoñako hotela, alegia, bideragarri egingo dituzten aukerak aztertzeko”.
Bestalde, Imanol Landak Marisa Arrue bozeramaile popularraren jarrera gogor kritikatu du. Izan ere, popularrak Getxoko Udalaren eta Barcelo enpresaren arteko kontratua apurtzeko ez ohiko udalbatza egitea eskatu zuen. Alkatearen ustetan, jarrera hori, "udal ordezkari batek erakutsitako eta nik ezagututako arduragabekeria eta arinkeriarik handiena da. Getxon bizi dugun krisi garaia dela eta, inoiz baino beharrezkoagoak diren lanpostuak sortzeko den inbertsio-proiektu hau amildegian ipini duelako helburu elektoralengatik”. Alkateak gaineratu duenez, "hautagai honentzat dena balio du, Getxoko herriaren interes orokorrak kolokan jartzeraino. Izan ere, 20 urtetan bere helburu bakarra Getxoko alkatesa bihurtzea izan da". Imanol Landak jarraitu duenez, "bere momentuan esan nuen, eta berdin jarraitzen dut, Udal hau serioa eta arduratsua da. Beste batzuek, berriz, ezin dute berdina esan, ikusi den bezala".
Punta Begoñako hotelaren proiektuarekin aurrera jarraitzeko aukera guztiak aztertuko ditu Barcelok
Imanol Landa Getxoko alkateak bere "poza" agertu du Barcelo Hotels Mediterraneo S.L. enpresak Punta Begoñan hotela egiteko proiektuaren inguruan zabaldutako mezuagatik. Horren arabera, enpresaren asmoa, "Aldundiaren txostena eta Getxoko Udalarekin sinatutako kontratua errespetatuz, proiektu honekin jarraitzea ahalbidetuko duten aukera guztiak aztertzea" da. Aipatu adierazpena Bizkaiko Foru Aldundiaren Ondare Sailak Punta Begoñako galerietan hotela egiteko baldintzei buruz zabaldutako azken jakinarazpenaren ondotik dator. Horren harira, hotel-enpresak bere "konpromisoa" agertu du gaia "zorrotz" aztertzeko, bai teknikoki, bai juridikoki. Bestalde, Barcelo enpresako arduradunek gaineratu dutenez, hotelaren proiektuaren eta bere bideragarritasunaren azken iritziak "ahalik eta arinen" helaraziko dizkiote Getxoko Udalari. Argazkian, Iñaki Uriarte arkitektoa Begoña Gazteluko galeriei buruzko azalpenak emanez, hainbat eragilek galerien erabilera publikoa aldarrikatzeko ekitaldian / © Getxosarea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun