Gazte bat atxilotu dute Erandioko auto-talka lapurreten egilea delakoan
2011ko api. 20a, 19:34
Ertzaintzak 22 urteko gizonezko bat atxilotu zuten atzo, Erandioko Erribera etorbideko arropa denda batean indarra erabiliz —erakusleihoa auto batekin hautsiz— egindako bi lapurreten egilea izatea egotzita. Martxoaren 25ean eta apirilaren 11n izan ziren gertaerak. Eusko Jaurlaritzaren Herrizaingo Sailak zabaldutakoaren arabera, datu basea aztertuta, bigarren lapurreta horretarako erabilitako Opel Kadett autoa hilaren 9an Galdakaon ostu zutela jakin zuten poliziek. Hiru egun beranduago, Bilboko Zorrotza auzoan aparkatuta aurkitu omen zuen. Ikuskatzean, motorra pizteko sistema manipulatuta eta lapurretak izan ziren arropa dendako etiketa batzuk ikusi zituzten ertzainek, Herrizaingo Sailak dioenez. Ikerketei esker, poliziek 22 urteko ohiko delitugile bat identifikatu zuten, bi lapurreta horien erantzule zelakoan; eta atzo bertan atxilotu zuten Erandion, haren etxetik gertu. Agenteek miaketa egin zuten haren etxean, baina ez zituzten ostutako arropak aurkitu. Atxilotuak delitu historial luzea du (berrogeita hamar aldiz baino gehiagotan atxilotu dute lapurreta delituak egotzita), eta datozen orduotan jarriko dute epailearen esku.Iragan martxoaren 25ean, goizaldeko ordu batak aldera, lapurreta baten berri eman zioten Ertzaintzari. Gaizkileek ibilgailu bat erabili zuten Erandioko merkataritza establezimendu batera sartu eta osteko. Lapurreta izan zen tokira bertaratuta, agenteek baieztatu egin zuten Erribera etorbideko arropa denda batean lapurreta egin zutela, auto batekin erakusleihoren kontra talka eginez. Ford Sierra bat ariete gisa erabili zuten lokaleko beiratea zulatzeko. Beira ez ezik, bertan jantziak erakusteko zituzten altzari ugari ere eraman zituen aurretik. Agenteek baieztatu zutenez, hainbat kirol jantzi eta motorrean joateko arropa ugari ostu zuten. Lapurreta hori egiteko erabili zuten Ford Sierra Bilboko Deustu auzoan ostu zutela ere jakin zuten ikerketaren ardura hartu zuten ertzainek. Ikerketaren lehen diligentzia horiek egin ondoren, apirilaren 11n, goizaldean, denda berean indarra erabiliz beste lapurreta bat egin zutela jakin zuten poliziek. Bigarren kasu horretan, lokaleko segurtasun kamerek hartutako irudiak aztertuta, gertatutakoa ikusi zuten. Opel Kadett batek, atzeraka maniobrak eginez, erakusleihoa apurtu zuen, behin eta berriro jota. Beira zulatutakoan, ibilgailuan zihoan pertsona bakarra, gizon bat, autotik irten eta arropa dendara sartu zen. Arropa ugari hartu eta kopilotuaren eserlekuan utzi ostean, ihes egin zuen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun