Hilaren 16an Korrika euskararen lasterketa hartu zuten Erandiok eta Uribe Kostako udalerriek. Larunbata, goizeko ordu arrazoizkoak, eguraldi ona eta euskalakarien umore ezin hobea lagun, Korrikak 71 kilometro egin zituen gurean, milaka eta milaka lagun errepidera atera zirela. AEK-k antolatzen duen ekimenean hamaika eratan egin zuten korrika gure haurtxo, ume, gazte, heldu, agure eta atsoek, bertakoek zein heldu berriek: oinez, makuluz, gurpil-aulkiz, patinez, bizikletaz, motorrez, kanoaz eta abar luze batez. Eskualdeko tribu ia guztiak bildu ziren euskararen alde nork bere harri-koskorra ekartzeko eta hamaika ekimen burutu ziren lasterketaren inguruan, tartean Getxoko Txorimalo gaztetxearen bosgarren urteurrena ere ospatu zutela. Egun horretako ehunaka argazki ikus daiteke hemen. Era berean, Koska irratiak egindako saio berezia hemen duzue entzungai (mp3).
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
