Arkaitz Goikoetxea euskal preso politikoa isolamenduko moduluan daukate Madrilgo Aranjuez espetxean eta, hartara, ostiraletan du bisita eguna. Apirilaren 21ean bere anaia Zigor bisita ordura joan, bisitetako departamentuan dokumentazioa eman eta komunikazioetako arduradunak, besterik gabe, “Zu ez zara sartuko” esan zion espainolez, Uribe Kostako Amnistiaren Aldeko Mugimenduak salatu duenez. Eztabaidan aritu ostean, eta beste biderik ez zuela ikusita, etxera bueltatu behar izan zuen, bisita egin gabe, errepresioaren kontrako erakundeak gaineratu duenez. "Gerora, Algortan zegoela, Arkaitzen telefono deia izan zuen, eta hark adierazi zion kartzelako segurtasun burua azalpenak ematera joan zitzaiola, eta Zigor 12:00etan joan zelako ez ziotela utzi bisita egiten, bisita ordua 10:00etan baitzen. Salaketarik ez jartzeko ere eskatu zion, mesedez eskatu ere, horrelakorik berriro ez direla gertatuko agindu ondoren", azaldu du AAMk. Zigor Goikoetxeak, ordea, salaketa jartzeko asmoa duela adierazi du. Argazkian, auzokide bat Zigorren anai Arkaitz Goikoetxearen argazkia sostengatzen, aurreko batean.
"Izan ere, bisitara sartzen uzten ez zutela-eta, etxera deitu zuen kartzelako komunikazioetako departamentuko telefono publikotik. Deitu zuenean 10:15ak ziren, eta ez 12:00ak, segurtasun buruak adierazi bezala. Telefono dei hori erregistratuta egongo da gainera", aipatu dutenez. Bere anaia Arkaitzek ere salaketa jartzeko asmoa duela adierazi zion Zigorri. Gogoratu behar da joan zen urtean ere Villenako espetxean antzeko gertakariak izan zituela, eta Azkorrikoari ez ziotela utzi bere anaia Arkaitz bisitatzen, orduan miaketa kontuak aitzakiatzat erabiliz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun