Baina ospakizunak alde batera utzita, gaurko markak ondorioak ere ekarri ditu: "Gaur arte erlojupekoetan ahalik ondoen egitera irteten nintzen, hoberen artean sailkatzera. Arratsaldekoaren ostean nire pentsaera aldatu da. Orain irabaztera irten naitekeela badakit. Beti moldatu naiz ondo modalitate honetan, baina hortik Romandiako Tourrekoa bezalako aitzin-etapa irabaztera jauzi handia dago. Gaur garaipena eskuratu dugu eta diziplina honetan etorkizuneko erronkei aurre egiteko nire ikusmoldea aldatu da", azaldu du Castroviejok.
Romandiako Tourreko lehen etapa bihar jokatuko da Martigny eta Leysin artean, 172,6 kilometrori aurre egin beharko diotela. Lehen mailako mendate batean amaituko da lasterketa.
Jonathanen ibilbidea
Castroviejo Punta Galea taldearekin hasi zen. Bertan lortutako sari eta arrakasten ondorioz, Bizkaiko txirrindulari gazterik onenaren izendapena jaso zuen.
Amateurretan, Seguros Bilbao taldearekin parte hartu zuen, Xabier Artetxek zuzenduriko taldea berau. Bere lehen urtean, hau da, 2006ean, postu on batzuk lortu zituen, bere taldekide zen Beñat Intxaustiri lasterketa askotan postu bikainak egiten lagunduaz. Bigarren urtean, Beñat Intxausti profesional mailara pasa zela, Seguros Bilbao taldeko buru izan zen Castroviejo eta emaitza benetan onak erdietsi zituen, Ereño, Laukiz, Bergara, Markina eta Euskadiko Erlojuaren Aurkako lasterketetan garaile izanez. Ondorioz, Lehendakari Saria irabazi zuen urte horretan, zeinek 21 urtez azpiko euskal txirrindularirik onena bereizten duen.
Amateurretan izandako ibilbide arrakastatsuaren ondorioz, Euskadi Fundazioak fitxatu zuen bere talderako. Talde honetan, lehendabizi Kontinental mailako Orbea taldean korritzen du, ondoren, maila izanez gero ProTour mailako Euskaltel-Euskadi taldera pasako delarik.
2009an, eginiko denboraldi bikainaren sari gisa, Etorkizuneko Tourrean parte hartu zuen, etapa batean garaile izatea lortuz. Sailkapen nagusiaren lehian, ordea, ezin izan zen sartu, lehen etapetan eroriko bat eduki baitzuen.
Gaurko sailkapena
1. JONATHAN CASTROVIEJO (EH/Euskaltel), 3 min. 40. seg
2. Taylor Phinney (AEB/BMC Racing), d.b.
3. Leigh Howard (AUS/HTC - Highroad), seg. 1-era.
4. Geoffroy Lequatre (FRA/RadioShack), 2 seg.
5. David Millar (UK/Garmin), 3. seg.
6. Dennis van Winden (HOL/Rabobank), d.b.
7. Patrick Gretsch (ALE/HTC - Highroad) 4.
8. Mark Renshaw (AUS/HTC - Highroad), d.b.
9. Alexandre Vinokourov (KAZ/Astana), d.b.
10. Daniele Bennati (ITA/Leopard), d.b.
Romandiako Tourreko atariko etapa irabazi du Jonathan Castroviejo getxoztarrak
Jonathan Castroviejo Euskaltel-Euskadi taldeko txirrindulari getxoztarrak Romandiako Tourreko aitzin-etapa irabazi du gaur. Suitzako kantoi frankofonoak zeharkatzen dituen biraren atarikoa Martigny-n burutu da, 3.500 metroko zirkuitu batean. Europa Press-ek jaso duenez, Castroviejok 3 minutu eta 40 segundo eman du hori gauzatzeko, Taylor Phinney estatubatuarrak baino 27 ehuneko gutxiago. Doi-doi bada ere, Castroviejok profesional gisa eskuratu duen garaipenik garrantzitsuena izan da gaurkoa. Garrantzitsuena eta hunkigarria, urtebetetzearen bezperan egokitu baitzaio: "Zorionekoa naiz, oso garaipen polita izan da eta poz-pozik nago. Gainera, bihar nire urtebetetzea da, beraz, opari ikusgarria izan da, ospakizun bikoitza daukagu". Argazkian, Castroviejo 2009ko Getxoko Txirrindularitza Zirkuituan, orduko Orbeako maillot-a jantzita.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun