Joaquin de Fuentes Bardaji Espainiako Estatuaren abokatuak 13:00etan aurkeztu du, Auzitegi Gorenean, Bildu koalizioaren 254 hauteskunde zerrenden aurkako inpugnazioa, Polizia txostenetan oinarrituta. Haren arabera, Bildu "ETAren estrategian" dago, Batasuna legez kanpoko alderdi politikoak "kutsatu" egin ditu maiatzaren 22ko udal eta foru bozetako zerrendak, eta "beste alderdietakoak baino Batasuneko hautagai gehiago daude". Ondorioz, uste du "legez kanpoko erakundeek kudeatzen, koordinatzen eta osatzen" dituztela Bilduren zerrendak. Hamasei herri hauteskunde elkargoren aurkako inpugnazioak ere sartu ditu Estatuaren abokatuak, atzean ETA eta Batasuna daudelakoan. Besteak beste, hautagaiak "ETA/Batasuna"-rekin lotzeko "Herri Programa lantzen, prestatzen eta publikoki aurkezten parte hartu izana" erabili du Guardia Zibilak bere txostenetan. Gauzak horrela, eta "boto proiekzioa duten edo hautatuak izan daitezkeen tokiak" begiratuta, horrelako %33,33na kasu topatu ei dituzte Berango eta Getxoko zerrendetan. Argazkian, Bildu koalizioaren Getxo udalerriko hautagaiak aurkeztu zituzten apirilaren 15ean.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
