Espetxean 18 urte eman ostean, BBVAn berronartu dezatela eskatu du Txetxu Fernandez Perez de Nanclares algortarrak. Egun lo egitera baino ez du joan behar Langraizko kartzelara. LAB eta ELA sindikatuen ustez (mp3), "bankuak ez lioke bere bizitza berrantolatzeko aukera ukatu behar, batik bat bere lan jardunarekin zerikusirik ez duen kontu batengatik preso egonda". ETAko kidea izatea egotzita atxilotu zuten 1992an. Fernandezek 22 urte eman zituen beharrean, lehendabizi Banco de Comercio-n eta gero BBVn. Gauzak horrela, mobilizatzen hasi dira langileak, algortarra berronartu dezaten. Hala ere, bankuaren erantzuna "ezezkoa" izan da: "berronarpenaren eskaerari erantzuteko, notario baten bidez 18 urte hauetan jaso ez zuen kaleratze gutuna helarazi zion", salatu dute LAB eta ELAko ordezkariek. Hori dela eta, "errepresio politikarekin bat egitea" egotzi diote BBVAri. Hurrengo elkarretaratzea maiatzaren 25ean egingo dute. Argazkian, 30 lagun elkartu dira gaur BBVAren Bilboko Kale Nagusiko egoitzaren aurrean.
ETAko kidea izatea egotzita, 1992an atxilo hartu zuten Txetxu Fernandez Perez de Nanclares algortarra. 2010eko abenduan espetxealdi arindua jarri zioten, gaua bakarrik eman behar duela Langraizen. Urte horretako otsailean Txetxu Fernandez Euskal Preso Politikoaren Kolektibotik (EPPK) kanpo zegoela baieztatu zuen Amnistiaren Aldeko Mugimenduak. Gatibuak berak jakinarazi zien gutun bidez ingurukoei eta AAMri, bere burua EPPKren diziplina eta babesetik at kokatzen zuela eta ordutik aurrera soilik bere izenean arituko zela. Algortarra 30 urteko espetxe zigorra ari da betetzen. Erredentzioak aplikatuta 2010ean behar zuen libre, baina Parot doktrina aplikatu diote. Txetxuren emazte Marian Perez del Riori dagokionez, 2007ko ekainaren 30ean askatu zuten, 15 urte preso egin ondoren. Bere senarrarekin batera atxilotu zuten, 1992ko maiatzaren 12an Barrikako euren etxean, hiru seme alaba txikiak kalean utziz. Egun langabezian dago.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun