Biltzarraren epaimahaikoek bela eta arraun pabiloien eraikitze sistema eta ingurunera egokitzeko erraztasuna baloratu dute. Horiek, ekipamenduaren kanpoko alertze egurrezko estaldura aintzat hartu dute. Peru Mugika arkitektoaren hitzetan, "material hori moilako kolorearekin ia nahasten dena eta mantentze-lanik behar ez duena da". Gainera, pabiloien forma eta tamainari dagokionez, "eskala oso murriztua du eta, horri esker, Arriluzeko moilako beste aldetik ez dira ikusten. Bestalde, inguruan dauden beste pabiloi batzuk baino askoz gutxiago nabarmentzen dira", zehaztu du Mugikak. Kirol ekipamendu hori pieza bakar baten beharrean bitan egin izanak zoruari itsatsiago utzi eta, ondorioz, begi-inpaktua murriztea eragin du.
Bela eta arraun udal pabilioiek miloi eta erdi euro inguruko aurrekontua izan zuten. Belarenak 1.000 metro koadroko azalera du eta, gaur egun, Bela Eskola hartzen du. Arraunekoak beste horrenbeste ditu eta, nagusiki, Getxo Arraun Taldeak erabiltzen du.
Getxoko Kirol Portuko bela eta arraun udal pabiloiek Valentziako I. Europako Kirol Azpiegituren Biltzarreko sari nagusia lortu dute. Kalitate eta diseinua saritzen duen izendapena, baina, Andaluziako Jaen hiriko arkitekto talde baten eraikinarekin partekatu behar izan dute. Aipatu biltzarra martxoaren 31tik apirilaren 2ra bitartean egin zuten Valentzia Europako Kirolaren Hiria izendatzearen ondorioz. Bertan, kirol azpiegituren diseinu multzo garrantzitsua bildu zen, Algortakoa barne. 2008. urtean zabaldutako bi ekipamendu horien diseinua euskal arkitekto talde baten lanaren emaitza da. Taldea Peru Mugika, Ander Aginako, Julen Altuna, Amaia Celaya eta Jakinda de Goyarzuk osatzen dute. Pabiloi horiek lortu duten hirugarren saria da, izan ere, 2010ean Madrilgo “Vivir con madera” eta Euskal Herriko Arkitektoen Elkargoaren Sarietan finalista izan ziren. Argazkian, Getxo Kirol Portuko bela eta arraun udal pabiloiak / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun