Txernobilgo hondamendia gogoratuko dute maiatzaren 10ean Erandion

Asteartean bete ziren 25 urte Txernobilgo hondamendiaz. Zentral horretan inoizko erradiazio nuklear isuririk handiena gertatu zen. Orain gutxi Japonian gertatutakoarekin ezin ahaztu. Hain zuzen ere, aipatu urteurren egunean aurkeztu zituen Josebiñe Aranaga Hezkuntza zinegotziak, Ukrania Gaztea elkarteak antolatuta, Erandiok hartuko dituen ekitaldiak. Horien artean, maiatzaren 10ean, musika emanaldia izango da Astrabuduako Josu Murueta kultur etxean, 19:00etan hasita. Kontzertuan, Europa Ekialdeko piezak eskainiko ditu Sarrikoko Musica Culta zentroko hari laukoteak. Bestalde, prestatu duten argazki erakusketaren irudirik esanguratsuenak aurkeztuko dituzte. Horretaz gain, Ukrania Gaztea elkartearen inguruko bideoa proiektatu eta bere lekukotasuna emango du Ukrainako haur batek. Ekitaldira joan nahi duenak 944 051 614 telefono zenbakira deitu beharko du aurretik, 9:00etatik 14:00etara arteko ordutegian. Argazki erakusketari dagokionez, maiatzaren 30ean eta 31n egongo da ikusgai Erandioko udaletxean; eta ekainaren 1etik 4ra Josu Muruetan. Argazkian, 2008ko udan eskualdera heldutako Europa Ekialdeko hainbat ume.