Ertzaintzak 26 eta 29 urteko bi gizonezko atxilotu ditu gaur Sopelan, surf denda batean indarrez lapurtzea egotzita. Sartzeko, saltokiko ateko kristala apurtu ostean, 22 neopreno jantzi (orotara, 3.000 euroko baliokoak) hartu eta furgoneta batean ihes egin dute ustezko gaizkileek, Eusko Jaurlaritzaren Herrizaingo Sailak zabaldutakoaren arabera. Poliziek goizaldeko ordu biak aldera jaso dute lapurretaren abisua; baita ihesarena ere. Minutu batzuk beranduago, Urdulizetik gertu, BI-634 errepidetik zihoan furgoneta bat geldiarazi du patruila batek. Barruan bi lagun zihoazen eta matrikula plakak paperez estalita omen zituen ibilgailuak. Ertzaintzak dioenez, atzeko partean topatu dituzte dendan lapurtutako jantziak; baita mailu bat, zerra, aliketak, bihurkinak eta eskularruak ere. Beste patruila batek dendan aurkitu ei du kristala apurtzeko erabilitako mazoa. Bi gazteak indarkeriaz egindako lapurreta egotzita atxilotu dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun