Bildu Getxok bidalitako oharra
Espainiako Auzitegi Gorenak maiatzaren 22ko udal eta foru hauteskundeetarako berak aurkeztutako 254 zerrendak baliogabetu egin ditu.
Egoera ez da berria baina Bildu inpugnatzeko erabakiak orain arteko muga guztiak gainditu ditu. Oraingoan ez da Ezker Abertzalea erasotzen, gure herriaren etorkizuna aldaketa politiko eta sozialaren parametroetatik eraikin ahi duen sektore sozial oso batena urka baizik. Horren adibide dugu inpugnazioek euskal jendartearen gehiengoa haserretu dutela, Euskal Herriko eragile politiko, sindikal eta sozial gehienek transmititu duten haserrea.
Nabarmena da erabaki politiko baten aurrean kokatzen garela. Ezker Abertzaleak behin eta berriz errepikatu du legez kanporatzeak ez direla alor juridikora mugatzen, abiapuntua erabaki politikoetan kokatu behar zela. Bildu koalizioarekin, inpugnatzeko erabakia zuzenean emana izan da, Euskal Herrian lotsa sortu duen espektakulua sorraraziz.
Honen guztiaren aurrean, salaketa egitea ezinbestekotzat jotzen dugu eta herri aktibazioaren beharra ikusita, biharko mobilizazioak babesteko deia luzatzen dizuegu:
Itzubaltzeta / Romon, maiatzaren 3an, 19:30ean Xake plazan: "Eskubide Guztien alde, ilegalizaziorik ez" lemapean burutuko dugun kontzentraziora deitzen zaituztegu. Bertan elkar ikusiko dugulakoan, Animo eta Eutsi! Irabaziko dugu!
V de Bildu kolektiboak zabaldutako bideoa (©)
Bildu koalizioaren zerrenden baliogabetzea salatuko dute bihar Uribe Kosta eta Erandion
Bildu koalizioak maiatzaren 22ko udal eta foru hauteskundeetarako aurkeztutako 254 zerrendak baliogabetu dituztela ezagutzera eman zuen atzo gauean Espainiako Auzitegi Goreneko 61eko aretoak. Ordutik hona, biderkatuz doaz erabaki horren kontrako mobilizazio deialdiak. Uribe Kosta eta Erandio ere ez dira salbuespena izango. "Eskubide guztien alde, ilegalizaziorik ez" lelopean, herri askotan egingo dituzte elkarretaratzeak. Leioaztarrak izango dira goiztiarrenak. Hitzordua arratsaldeko 7:30ean jarri dute Bulebarrean. Ordu berean, Areetako Xake plazan ere egingo dute beste kontzentrazio bat. Ordu erdi beranduago, 20:00etan, besteak beste, ondoko lekuetan izango dira kontzentrazioak: Algortako Telletxe plazan, Erandioko metro geltoki ondoan, Gorlizko udaletxeko plazan, Plentziako Pirulin eta Sopelako udaletxeko plazan. Azkenik, gaueko bederatzietatik aurrera, bilera birtuala egingo du V de Bildu kolektiboak. Nahi duen guztiak parte hartu ahal izango du. Argazkian, Bildu koalizioak Erandion aurkeztutako hautagaiak / © Bildu Erandio.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun