Zerbitzu minimoak direla eta, Eusko Jaurlaritzari, eskoletako zuzendaritzei eta enpresei langileen "greba eskubidea urratzea" leporatu diete ELA, LAB eta UGTko ordezkariek. Jakinarazi dutenez, salaketak prestatzen ari dira "kolektiboaren eskubideak zapaldu dituztenen kontra". Bestalde, Algortan, Eskumaldeko beharginak Zabala eskoletara gerturatu behar zirenerako, Ertzaintzaren bi patruila auto zain zituzten kalean. Tokiko jantokiaren horniketaz arduratzen den Erandioko Cocina Central Goñi enpresako kamioia, berriz, atean zegoen. Azken horrek alde egin duenean joan dira poliziak.
Ikusi argazki guztiak:
ELA, LAB eta UGT sindikatuek deituta, bost eguneko grebari ekin zioten atzo eskola publikoetako jangeletako langileek. Lanuzteen bitartez, "Lan Hitzarmena egoera larrian" dagoela ohartarazi nahi dute beharginek. Azpikontratetan ari diren langileen soldatak, Eusko Jaurlaritzako langileenekin parekatzea eskatzen dute. Bestalde, ordu gehiago eskatzen dituzte formaziorako eta ikasle gutxiago, begirale bakoitzeko. LABek adierazi duenez, jarraipenari dagokionez, "oraingoz datu zehatzagoen faltan, aurreratu dezakeguna da atzokoa baino handiagoa izan dela". Gaur arratsaldean bertan daukate negoziazio mahaia. Bitartean, lanuzteez gain, eskualdez eskualde egin dituzte mobilizazioak gaur eguerdian. Gureari dagokionez, Algortako Telletxe plazatik abiatu dira 11:45ean Eskumaldeko 40 bat behargin, Zabala, Getxo 1, Fadura eta Zubilleta hezkuntza zentroetatik kalejira egiteko. Bihar, asteazkena, Aixerrota institutuan batuko dira, 11:30ean. Argazkian, grebalariak Cocina Central Goñi enpresako kamioia aurrean dutela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun