Sopelako ekitaldiaren amaieran Saioa Villanueva Bildu koalizioak aurkezten duen zerrendaburuak eta Guillermo Garcia de la Fuente Alternatibaren zinegotzia eta hautagaiak komunikatu bat irakurri zuten, Espainiar Estatuak hartu duen erabakia salatzeko. Bestalde, Bilduren zerrenden baliogabetzea salatzeko kalera ateratzeko deialdia luzatu die langileei Euskal gehiengo sindikalak. Horregatik, elkarretaratzeak deitu dituzte ostiralerako, eguerdiko 11:30ean Hego Euskal Herriko lau hiriburuetan.
Hona hemen Sopela.net agerkari digitalak zabaldutako bideoa:
Sopelan biharko deituta zeukan aurkezpen ekitaldia bere horretan mantentzea erabaki du Bildu koalizioak. Hartara, 19:30ean egingo dute agerraldia Kurtzio Kultur Etxean eta, jarraian, Bilboko Moyua plazara abiatuko dira bertan egongo diren gainontzeko herritarrekin bat egiteko, Sopela.net agerkari digitalak aurreratu duenez. Gogoratu, ostegun honetarako, manifestazio nazionala deitu dutela Eusko Alkartasunak eta Alternatibak. Martxa 20:00etan irtengo da Bilboko Jesusen Bihotzetik Moyua plazaraino heltzeko. Bertan, Espainiako Gobernu Zibilaren aurrean planto egingo dute bildutako guztiek, Auzitegi Konstituzionalaren berriaren zain eta "benetako demokraziaren beharra" aldarrikatzeko. Bitartean, atzo arratsaldean, ia ehun lagun elkartu ziren Sopelako udaletxeko plazan, Gernikako Akordioaren tokiko sinatzaileek deituta, Gorenak Bilduren zerrenda guztiak baliogabetu izana salatzeko. Eskualdeko herri gehienetan ere izan ziren kontzentrazioak: Algortako Telletxe plazan (400), Areetako Xake plazan (100), Berangoko Gudarien plazan (72), Erandioko metro geltoki ondoan (200), Gorlizko udaletxeko plazan (80) eta Plentziako Pirulin (70), besteak beste. Leioako Bulebarrean ere egin zuten elkarretaratzea. Argazkia: © Sopela.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun