Beste urte batez, Sahararen aldeko euskal karabanarekin bat egin du Gorlizko Udalak. Horrenbestez, elikagaiak (azukrea, atuna eta sardinak oliotan, arroza, pasta eta lekale lehorrak) eta higiene-gaiak (konpresak eta helduentzako pardelak) batzen hasi dira jada. Horiek guztiak ekainaren 30era arte eraman ahal izango dira kultur etxera zein turismo eta udaletxeko bulegoetara. Diruz lagundu nahi dutenek, berriz, Caja Laboralaren ondoko kontu zenbakian egin dezakete: 3035-0028-17-0281152900. 2001eko martxoan Saharako Guera herrixkarekin senidetu zenetik, hainbat ekimenetan hartu du parte Gorlizko Udalak, saharar herriari laguntza emateko. "Hango herritarrak bidegabeko erbestean bizi dira azken 35 urteetan, Aljeriako Saharako basamortu latzean", azaldu dute tokiko agintariek. Argazkian, Saharar Errepublika Demokratikoaren (SEAD) aldarrikapenaren 30. urteurrenarekin bat eginez, bandera sahararra jaso zuten ikurrinarekin batera Gorlizko udaletxean, 2006ko otsailaren 27an / © Gorliz.net.
Fronte Polisarioak EAEn duen ordezkaritzak eskatutakoari jarraituz dago martxan Sahararen Aldeko Euskal Karabana, Euskal Fondoaren Sahararako Koordinazio Unitatearen laguntzarekin. Elkartasun kanpaina horren helburu nagusia "Saharako herriari jakiak helaraztea da, ahal den neurrian behintzat, herritarrek duten elikadura txarra eta anemia tasa handiegia arintzeko edo, ume eta haurdunengan bereziki", azaldu dute udal arduradun gorliztarrek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun