Ostiral eta larunbatean pop-rock musika emanaldiak izango dira Algortako Ereaga hondartzako aparkalekuan, Getxoko Kultur Etxeak antolatuta. Lehenengo egunean, Gernikako Ken Zazpi taldea arituko da, 22:00etatik aurrea. Biharramunean, berriz, saio bikoitza egongo da 21:00etatik aurrera, Zenttric eta We Are Standard banden eskutik. Kontzertuak dohainik izango dira. Ostiraleko saioari dagokionez, azken diskoaren kantak ekarriko ditu gurera Ken Zazpik, "Ortzemugak begietan", hain zuzen ere. Lana Euskal Herrian eta Estatu Batuetan grabatu dute eta kanten letrak idazteko, Joseba Sarrionandia, Maialen Lujanbio, Jon Maia, Julen Gabiria eta Uxue Alberdirekin ibili ziren elkarlanean. Doinu berriak aurkitzeko asmoz, gernikarrek musika anglosaxoiaren eraginak gehitu dizkiete euskal tradiziozko doinuei. Argazkian, Ken Zazpi / © Getxoko Kultur Etxea.
Larunbatean, Zenttric talde bilbotarrak emango dio hasiera, 21:00etatik aurrera, eguneko saio bikoitzari. Bere musikan, "brit-pop" eta "indie rock" estiloen eraginak nabariak dira eta kutsu britainiarreko abesti indartsuak eta melodikoak dute ezaugarri nagusi. Zenttric-ek bere azken lanaren zenbait abesti aurkeztuko ditu Algortan, lehenengo aldiz. Azkenik, 23:00ak aldera, We Are Standard taldeak itxiko du gaua. Getxoztarrek MTV Europa sarietako bat eskuratu zuten 2008an. Hiru estudio disko grabatu ondoren, taldeak arrakasta handia lortu du egungo musika eszenan eta hainbat kontzertu eskaini ditu Europan, Amerikan eta Asian. Leku horietan guztietan publikoarekiko lotura eta estilo dantzagarria erakutsi ditu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun