Horrela, Konstituzionalak egun bakarra izango du bere erabakia hartzeko, hauteskunde kanpaina hasi baino lehen egin behar duelako, hau da, ostegun gauerditik ostiralera doan tartea baino lehen. Iturri judizialek jakitera eman dutenez, aipatu auzitegiak bihar 10:00ak baino lehenago beraien alegazioak bidal ditzatela eskatu die Estatuko Abokatutzari eta Fiskaltzari. Printzipioz, Konstituzionalaren Bigarren Salaren ardura izango da horren inguruan erabakitzea.
Euskal Herriko Unibertsitateko Errektoretzaren adierazpena:
Euskal Herriko Unibertsitateak, datozen hauteskundeetan aurkeztekoak ziren 258 zerrenda baliogabetu dituen Auzitegi Gorenaren epaia dela-eta, gizarte-erantzukizunez eta bere estatutuen 4. artikuluko 2. atalean jasotakoa betez, honako hau jakinarazi nahi du:
Pertsona guztiek dute politikan aritzeko eskubidea, eta printzipio ukaezina da hori demokrazian. Unibertsitatearen ustez, badira kontuan hartu beharreko oinarrizko balio eta printzipio batzuk, bai eztabaida politikoan, bai unibertsitate-eztabaidan: hau da, ideien debate librea, akordioak bilatzea eta joera politiko guztien parte-hartzea eremu publikoan, hitzaren eta arrazoiaren bidez.
Unibertsitate-eztabaidaren eremuan ideiak erabiltzen dira, inoiz ez bortizkeria, eta ideia guztiak onartzen dira, ez da bakar bat ere isilarazten. Bi printzipio hauek funtsezkoak dira bizikidetza demokratikorako, eta tinko aldarrikatu beharko genituzke gaur egun bizi dugun egoeran.
Politikan aritzeko eskubidea "printzipio ukaezina" dela aldarrikatu du EHUko Errektoretzak
Espainiako Auzitegi Gorenak Bildu koalizioaren 258 hauteskunde zerrendak baliogabetzeko hartutako erabakiaren aurrean, bere iritzia plazaratu du gaurkoan Euskal Herriko Unibertsitateko Errektoretzak. EHUko arduradunen hitzetan, pertsona guztiek dute politikan aritzeko eskubidea, eta "printzipio ukaezina" da hori demokrazian. "Badira kontuan hartu beharreko oinarrizko balio eta printzipio batzuk, bai eztabaida politikoan, bai unibertsitate-eztabaidan: hau da, ideien debate librea, akordioak bilatzea eta joera politiko guztien parte-hartzea eremu publikoan, hitzaren eta arrazoiaren bidez", gaineratu dutenez. Unibertsitate-eztabaidaren eremuan bezala, bizikidetza demokratikoan "bortizkeriarik eza eta ideia guztien onarpena" aldarrikatu ditu Errektoretzak. Bestalde, Bilduren kontrako ebazpena gaitzesteko adierazpena izenpetu dute 400 abokatuk eta unibertsitateko irakaslek baino gehiagok, "Gara" egunkariak zabaldu duenez. Beraien ustez, "zerrendak legez kanpo uzteak kalte egiten die hauteskundeetan hautatua izateko eskubideari eta botoa emateko eskubideari". Bitartean, Gorenaren epaiaren kontrako babes eskeko helegitea aurkeztu du jada Bilduk, 16:00ak aldera, Auzitegi Konstituzionalean. Argazkian, atzo 72 lagunek egin zuten elkarretaratzea Berangon / © Bildu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun