Hilaren 9an, astelehenarekin, Sopelako Udalak udalerriko dendek botatzen duten papera eta kartoia biltzeko egitasmoa jarriko du martxan. "Horrekin, elementu horien birziklapena bermatu nahi dugu", adierazi dute arduradunek. Aipatu egitasmoa, Rezikleta enpresarekin elkarlanean eginda dago. "Eguneroko jardunean aldaketa txikia eginez bizi kalitatea eta ingurumena modu nabarian hobetu ahal izateko" bitartekoak jarriko dituzte, jakinarazi dute arduradunek. Gainera, edukiontzien inguruko hondakinen pilatzearen irudiarekin ere amaitu nahi dute. Aipatu egitasmoa urte bukaerara arte egongo da indarrean. Argazkian, zakarrontzi baten ondoan utzitako kartoizko kutxak / by-sa daniel.julia.
Pilaketa lana errazteko bilketa guneak jarriko dituzte denden inguruetan. Batze lanak astean hiru egunetan egingo dituzte: astelehena, asteazkena eta ostirala, 13:00etatik 16:00etara. Gune horietan soilik kartoia eta papera bota beharko da, "beste lehengairik gabe, hala nola, plastikoa, metala edo bilketarako artelazkia", jakinarazi dute arduradunek. Biltze lana Rezikleta gizarte ekintza kooperatibak egingo du. Papera eta kartoiaren biltze selektiboan berezituta dago Rezikleta eta, bertan, gizarte baztertze egoeran dauden pertsonek egiten dute lan. Bildutako materiala birziklatutako paper berria ekoizteko eta beste produktu ekologiko egiteko erabiliko da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun