Baina argi geratuko den beste gauza ere bada PSOEk euskal eragileei erantzun digula eta prozesu demokratikoari ezetz esan diola. Ezetz borobila konponbidearen eta bozken artean hautatzerakoan bozkak hautatu dituelako (hori bada guzti honen atzean dagoena) eta oinarri demokratiko minimo batzuk ziurtatzeko erabakia hartu ordez itun antiterroristan urrats berria ematea erabaki duelako.
Galdera asko egin daitezke: Zertarako balio du PSOEren gobernu batek PPren politikak egingo baditu? Eta nola iritsi akordio minimo batera hauekin errepresioan nor baino nor astakirtenago bada estatu espainolean politika egiteko eredua oraindik orain? Guztiok dakigu gatazka politikoa behingoz eta betirako konpondu nahi badugu Estatuekin elkarren arteko errespetuan oinarritutako akordioak lortu beharko ditugula. Baina oraingoz, hobe dugu Euskal Herria, askatasun demokratikoen eskakizuna eta euskal eragileak zein herritarrak bide honen alde ditugun konpromisoak indartzeari garrantzi osoa ematea partidu hauekin zerbait egin daitekeen eztabaidan galdu gabe.
Gauean jakingo dugu konstituzionalak zer esaten duen. Ilegalizazioa bada, asmatu beharko da Euskal Herrian behar beharrezkoa den demokraziaren aldeko bidea hauteskunde hauetan ere indartzeko formula hoberena zein den. Baina bitartean, gauza bat argi dago, zenbat eta zabalagoa erantzuna eta zenbat eta gehiago egoera hau onartezina dela kalean adierazten dugunak, orduan eta aukera gehiago guzti guztiak izateko demokraziaren aldeko hautua egitera behartuak daudenak.
Ainhoa Etxaide LAB sindikatuaren idazkari nagusia
Egoera antidemokratiko bat demokratizatzeko hartu dugu hartu dugun bidea euskal eragile politiko, sindikal eta sozial askok. Herri honek egin duen borrokari esker konponbide prozesu bat aurrera ateratzeko baldintzat badaudela iritzita. Gernika hori da, besteak beste. Eskubide gehiegi urratuak dituen herri baten argazkia, eta horri buelta emateko konpromisoak bereganatu eta eskatzen dituen sektore oso bat. Konstituzionalak ilegalizazioan tematzea erabakiz gero ez du bide hori zapuztuko beraz, argazkia benetakoa dela ikusiko da eta berriro ere nabarmen ikusiko da alde guztien konpromiso eta urratsik gabe ezinezkoa dela konponbideak eraikitzea. Arrazoi gehiago prozesua erabaki berriekin eta indar gehiagoz bultzatzeko. Argazkian, Ainhoa Etxaide pasa den Maiatzaren Leheneko ekitaldian / cc-by-sa LAB sindikatua.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun