Bertara joateko, doako autobusak egongo direla jakinarazi du Berbots Erandion Euskaraz elkarteak. Gauzak horrela, 11:00etan hasita, Altzagako Santi Brouard plazatik abiatuko da garraioetako bat, ordu erdian behin. Astrabuduako Iturribengoa zeharkaletik irtengo dena ere maiztasun berbera izango du, 11:15etik aurrera. Azken autobus horrek Erandio Landako elizan ere hartuko ditu Asuarako bidaiariak.
Egitaraua:
12:00 Erandioko dantza taldeak: Goialde (Erandio Landa), Trabudu (Astrabudua) eta Uztargi (Altzaga).
13:15 Mendibaiarte abesbatza.
13:30 Bertso saioa: Miren Amuriza eta Arkaitz Estiballes.
14:30 Ohiko herri bazkaria (nork berea eginda).
17:00 Betiko kantuak, Kepa Arrizabalaga eta Roberto Etxebarriaren laguntzaz, mahairen inguruan bazkalosteko goxoa egiteko. Eta umeentzako antzerkia Sointek taldearekin.
18:00 Erromeria: Arrabots taldea.
Egun osoan umeentzako puzgarriak eta tailerrak, arku jaurtiketa, taloa… eta batez ere guztion animo ederra.
Kanpomartxon laguntzeko jende bila dabiltza
2011ko mai. 6a, 14:26
Guztia prest dago igande honetan, maiatzak 8, Asuan ospatuko den Kanpomartxorako. Hala ere, "den-dena eder jartzeko" jende bila dabil Berbots Erandion Euskaraz elkarteak. Hartara, larunbatean, goizeko 10etan geratu dira Bekoa ikastetxean, gauzak hartu, eta handik Asuako eskoletara joateko. Igande eta astelehenean ere hitzorduak jarri dituzte Asuan bertan, 9:00etan eta 10:00etan, hurrenez hurren. Azken txanda hori garbiketa lanetarako izango da. Antzina, Erandioko auzo ezberdinetako baserritarrak apirilaren hasieran aukeratutako egun eta toki batean batzen ziren Kanpomartxo izeneko festa egiteko. Egun horretan, musika doinuz eta dantzaz beteriko jai egunaz gozatzen zuten. Finean, erandioztar guztien arteko harremanak sendotzeko balio zuen ospakizunak. Bada, hainbat hamarkadatan galduta egon ostean, orain dela 18 urte berreskuratu zuen baserri giroko euskal jaia Berbots Erandion Euskaraz elkarteak. Ordutik hona, udalerriko txoko ezberdinak txandakatuz egin dute urtetik urtera. Gauzak horrela, eguerditik aurrera, dantzak, bertsolariak, antzerkia, jolasak... edukiko dituzte, egunean zehar, Asuan batzen direnek. Besteak beste, Trabudu, Goi Alde eta Uztargi dantza taldeak eta Algortako Bertsolari Eskola (ALBE) dituzte laguntzaile Berbotsekoek. Argazkian, iaz Lutxanan ospatu zuten Kanpomartxo jaia.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun