Valentin Solagaistua Algortan jaio zen 1937an, eta gaur egun Sopelan PSE-EEko zinegotzi zen. Aurretik, ordea, hainbat erakundetako eta alderditako kide izan zen. Frankismoan ETAko kide izan zen, eta lau urte eman zituen espetxean. Venezuelara joan zen gero, eta bertan EAE-ANVko kide historikoak ezagutu zituen, Pello Irujo eta Gonzalo Nardiz, esate baterako. Horien bitartez sartu zen Eusko Abertzale Ekintzan. Franko hil ondoren Euskal Herrira itzuli eta EAE-ANVko idazkari izan zen, bost urtez. Txibertako elkarrizketetan parte hartu zuen, eta Adolfo Suarezengana amnistia eske joan zen alkate ordezkaritzako kide ere izan zen.
EAE-ANVko zuzendaritzan dimisioa eman arren, alderdikide izaten jarraitu eta Getxoko zinegotzi zein Bizkaiko Batzar Nagusietako diputatu bilakatu zen, 1979ko udal eta foru hauteskundeen ondoren. Euskadiko Alderdi Komunistara joan zen gero, eta Ezker Batuaren sorreran parte hartu ondoren, koalizio horretako hautagai izan zen 1990eko hamarkadan. Azken urteak PSE-EEn eman zituen, eta 2007ko udal hauteskundeetan Sopelako zinegotzi hautatu zuten. 2003an "Getxo, historia de sus gentes" liburua argitaratu zuen.
Bizkaiko PSE-EEko zuzendaritzak "samin handia" agertu du, goizaldean Valentin Solagaistua Sopelako sozialisten bozeramailea eta udal hauteskundeetarako hautagaia zendu delako. Jose Antonio Pastor Bizkaiko PSE-EEko idazkari nagusiak nabarmendutakoaren arabera, "adiskide mina, hurbila, atsegina eta lan egiteko gaitasunez betea" zen Solagaistua. "Gaixorik egon arren, bizi posez eta hauteskunde kanpainan parte hartzeko gogo handiz jarraitzen zuen", azpimarratu du Pastorrek. Halaber, sozialista guztiei zein zendutakoaren familia eta lagunei babesa eta laguntasuna helarazi die Bizkaiko PSE-EEko buruak. Solagaistuaren gorpua Algortako Sarria tanatoriora eraman dute, bertan azken agurra egiteko asmoz. Argazkian, Valentin Solagaistua Sopelako udal batzar batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun