Etzi, asteazkenarekin, Leioako Behargintzak programa berezia prestatu du Ekintzaile Eguna burutzeko. Aipatu ekimena, Europako hiri nagusietan egin ohi da, ekintzaileen lana zabaltzeko eta hiri-garapenari dakarkioten balioa aintzatesteko. Udalerrian egiten den lehenengo edizio hau, ekintzaileen lanari "erakundeek ematen dioten sustapenean" zentratuko da, antolatzaileek jakinarazi dutenez. Kontzeptu hori diziplina anitzeko ikuspegitik bultzatu nahi dute: soziala, ekonomikoa eta kulturala. Gauzak horrela, hainbat ekintza antolatu dute: "Ekintzaileen psikologia" izeneko hitzaldia; "enpresak sortzearen aldeko politikak" gaiari buruzko mahai-ingurua eta ekintzaileen esperientziak trukatzea, besteak beste. Bestalde, aktibitate osagarri gisa, Behargintzak ekintzaileentzat negozio-ideiak sortzeko hainbat tailer antolatu ditu gaur, bihar eta etzi. Tailerretara eta asteazkeneko ekimenera joateko plazak mugatuak dira, beraz, aldez aurretik izena ematea gomendatu dute antolatzaileek. Argibide gehiago Leioako www.bat-leioa.com web gunean topa daiteke. Argazkian, Leioako Behargintza bulegoa / © Leioa.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun