Getxoko Udaltzaingoak 36 urteko emakume bat atxilotu zuen larunbatean, "tocomocho" sistemaren bidez hainbat iruzur egin dituelakoan. Ustez, atxilotuak kanpotar emakumeak aukeratzen zituen biktima moduan. Kaletik zihoala horiengana hurbiltzen omen zen helbideren bati buruz galdetzeko, bizitzeko tokia behar zuela esanez. Ondoren, "laguntzen" zion gizon bat hurbildu eta Espainiako loteriaren billete bat erakusten zien. Jarraian, horrek loteria-bulego batean billetea begiratu eta diru kopuru handi batekin sarituta zegoela simulatzen zuen, udal iturrien arabera. Iruzurgileak etxera laguntzen zuen biktima, dirua ote zuen egiaztatzeko. Diru kopuru handiak lortu ei ditu horrela atxilotutako emakumeak: 7.000 euro, 1.500 euro eta 4.800 euro, salatutako kasuetan. Kaltetutako pertsonek Getxoko Udaltzaingoarengana jo dezakete, 944 660 202 telefono zenbakira deituz.
Joan den larunbatean, hilaren 7an, iruzurra jasan zuen emakume batek ustezko gaizkilearekin topo egin zuen Algortako Telletxe plazan. Horrek berarengana joan eta iruzur berbera egiten saiatu omen zen, udal iturriek diotenez. Baina, momentuan, iruzurtia ezagutu eta bere dirua eskatu zion. Aipatu plazan eztabaidatzen ari zirela, martxoan iruzur berbera jasandako beste emakume bat bertaratu eta ezagutu zuen. Horrek udaltzainak abisatu eta, egoera argitu ondoren, ustezko iruzurgilea atxilotu zuten. Ordu gutxitan beste iruzur baten berri izan zuten agenteek eta beste kasu batzuk ere egon daitezkeela uste dute. Izan ere, Mostolesko eta Bartzelonako epaitegiek emakume horren kontrako bilaketa aginduak igorri zituzten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun