Erandioko Bilduren bulegoaren inaugurazioaren irudiak:
Espainiako Auzitegi Konstituzionalaren erabakia ezagututa, alaitasuna izan zen nagusi ostiralean Altzagako San Jeronimo kaleko 6. zenbakian. Bildu koalizioak bertan zabaldu du hauteskunde bulegoa eta aipatu egunean egin zuten inaugurazio ekitaldia. Batutako dozenaka lagunen artean, tokiko hautagaietatik hiruk hartu zuten hitza. Batetik "lotsagarritzat" jo zuten 200 erandioztar baino gehiago bozetara aurkeztu ezin izatea. Txantxetan, "kutsatuak" egonda erabakia "Espainiako Ingurumen Ministerioak hartu behar ez ote zuen" aipatu zuten. Bada, oraindik banatzekorik ez daukaten arren, Udala "haize freskoz betetzeko" asmoa iragarri dute, beraien proposamenak mahai gainean jarriz. Hauteskunde kanpaina aurrera ateratzeko, berriz, herritarren parte hartzea eskatu zuten. Horretarako izango du bulego berria Erandioko Bilduk: herritarrek hauteskunde programa zein ekitaldien berri izan dezaten, horiek ere laguntza eskain dezaten... Horretaz gain, Interneteko hainbat baliabide erabiliko dituzte: Twitter, Facebook... Argazkian, Erandioko Bilduren hautagai gehienak bulego aurrean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun