Pasa den igandean, Manex Zubiaga Bravo preso politiko algortarra bisitatzera zihoazela, bere bi lagunek eta Lander Etxeberria presoaren bi gurasoek auto istripua izan zuten. Etxerat elkarteak jakinarazi duenez, "sakabanaketa politikak" eragin duen aurtengo laugarren istripua herenegun goizeko 5ak aldera jazo zen, Lerma inguruan, 213. kilometroan, Madrilgo Estremera espetxerako bidean. Preso politikoen senide eta lagunen elkartearen arabera, "obretan zegoen bi norabideko errepide batean, errepide erdira azeri bat atera izanagatik kotxe batek bat-batean geratu behar izan zuen. Bere atzean zihoan kotxeak aurrekoa saihestu ahal izan zuen albo batera joanez, baina Zubiaga eta Etxeberria presoen senide eta lagunek ezin izan zuten bigarrengo kotxea saihestu eta bere aurka jo zuten. Zorionez, senide eta lagunek ez dute kalte fisikorik pairatu eta Estremeran zuten bisitak burutu ahal izan zituzten". Argazkian, Zubiaga 2009an, Espainiaratu zutenean / © Espainiako Barne Ministerioa.
Manex Zubiaga 2002an atxilotu zuten Frantzian. Hainbat alditan espainiaratu zuten behin behinean, epai zezaten. Frantzian ezarritako zigor guztiak bete ostean, 2009an eraman zuten berriro Espainiara. Hasiera batean Soto del Realgo espetxean egon zen, baina harrez gero Estremerako Madrid VII espetxean dago.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun