Leioa, Erandio, Balmaseda eta Ugaoko Siroka musika taldeak estudioko bigarren lana aurkeztu du gaurko egunean: "Karosi" disko-liburua. Musikherria herri-diskoetxearekin kaleratu dute, zortzi hilabeteko lanaren ostean. Musikari dagokionez, diskoaren lehenengo 8 abestiak Urdulizko Tio Pete estudioan grabatu zituzten martxoaren 11tik eta apirilaren 9ra bitartean, Karlos Zubiaga teknikoaren eskutik eta Jabi Palaciosen produkzioaz. Azken abestia, "Bihotzetatik zintzilik", Etxerat elkartearentzat grabatu zuten 2010eko ekainaren 19 eta 20an, Andoaingo Garate estudioan, Martxel Arkarazoren eskutik. Musikalki, taldeak eboluzio bat jasan du eta bigarren lan honetan funky, pop eta soul ukituak dituen rock musika entzun daiteke, laukoteak gaurko prentsaurrekoan (mp3) adierazi duenez. "Karosi" disko-liburua hainbat dendetan egongo da salgai, 10 eurotan; Bilboko Gatazka gunea eta Algortako Eztabaida gune antiautoritarioa, kasu. Horretaz gain, abestiak Internet bidez eskura daitezke, baita sakeleko telefonoan ere. QR delakoa erabiliz, pegatinak egin dituzte kalean edonork diskoa mugikorreko "klik batekin" eskura dezan. Diskoa aurkezteko biraren lehenengo kontzertua larunbat honetan emango dute Getxoko San Isidro jaietan. Sirokarekin batera, Oihartzuna eta Obrint Pass taldeak igoko dira oholtzara, 21:30etik aurrera. Argazkian, Bilboko Gatazka gunean aurkeztu du "Karosi" disko-liburua Sirokak, hainbat abestiren hitzak egin dituzten Beñat Hach Embarek eta Mikel Etxabururekin batera.
Musikaz gain, liburu batekin dator Sirokaren CD berria. Edukiari dagokionez, lan osoa "lehentasunak" kontzeptuan oinarritu da. Hainbat lehentasun aukeratu eta gero, lehentasun guzti horiek abestien bidez eta istorioen bidez deskribatu dituzte eta emaitza bezala 9 ideia, 9 abesti eta 9 istorio sortu dituzte. Abestien hitzak, Sirokaren berezko uztaz gain, Ruben Riverok, Jone Uriak, Mikel Etxaburuk, Beñat Hach Embarek-ek eta Gotzon Barandiaranek egin dituzte eta ipuina Sirokaren berezko ekoizpena izan da. Nortasuna, hizkuntza, adiskidetasuna, askatasuna, borroka, denbora, gozamena eta maitasuna bezalako lehentasunetan oinarritutako 9 abesti eta 9 istorio. Eta istorioan barneratzeko Karosi eta Rosika protagonisten gidaritza paregabea izan dute.
Familia handituz
"Argi geratu da Sirokako familia handitu dugula", adierazi du laukoteak gaurko aurkezpenean. Orain arte aipatutakoez gain, beste lagun batzuk izan dituzte alboan beraien bigarren estudioko lana prestatzen. "Hi Vascofona!" abestiaren bideoklipa Markos Arroyok grabatu du eta laster egongo da ikusgai. Taldeko argazkiak Alfredo Ramirezek eta Goio Ramosek egin dituzte. Eta Mikel Olasagastik eta Hodei Cepedak hedatu dute diskoa Internet bidez.
Diskoa eskuratzeko aukerak
Hainbat dendetan egongo da eskuragarri "Karosi" disko-liburua; Bilboko Gatazka gunean eta Algortako Eztabaida gune antiautoritarioa, kasu. Bestalde, Gatazka guneko posta bidezko zerbitzua ere erabiliko dute. Azkenik, Internet bidez, 2Dzanga enpresako Hodei Cepedak diskoa zuzenean sakelekora deskargatu ahal izateko QR delakoa sortu du eta web orri berezi bat egin du diskoa ostatzeko. Izan ere, orain arte entzungai egon den "Hi Vascofona!" single-a eskuragarri izatetik, disko osoa eskuragarri egotera pasa da. QRrekin eta "Karosi"-ren irudiarekin pegatinak egin dituzte kalean edonork diskoa mugikorreko "klik batekin" eskura dezan.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Leioa, Erandio, Balmaseda eta Ugaoko 