Joan den larunbatean eman zion hauteskunde kanpainari hasiera Getxoko Bilduk. Jai giroan ospatu zuten lehenengo agerpena, Algortako Tellagorri plazan. "Hasiera batean, Athletic-ek publikoa kendu zigun arren, arratsaldea pasa ahala gero eta jende gehiago animatu zen. Horren isla izan zen banatu genituen txorixo eta txistorraren kiloak", adierazi dute koalizioko kideek. Umeentzako jolasak, txalaparta-tailerra, makillajea, musika, bertsolariak… izan zituzten bertan, giroa alaitzeko. Horretaz gainera, nahi izan zutenek beraien proposamenak ezagutzeko aukera izan zuten, bertan Getxo udalerrirako duten programaren ildo nagusiak ikusgai baitziren, baita beraien hautagaitza ere.
Igandean, berriz, 300 lagun baino gehiago batu ziren eguerdian Xake plazan. Ekitaldi politikoan, Itzubaltzetarako dituzten proposamenak aurkeztu zizkieten bildutakoei Maitane Nerekan Umaranek eta Roberto Martinek. Besteak beste, aparkalekuak, gaztetxea, plazen urbanizazioa, kultur etxea, herriko jaiak, emakumeek herrian pairatu dituzten erasoak, etorkinek integratzeko dituzten mugak edota euskaraz bizitzeko zailtasunen inguruan jardun zuten.
Bilduren ekitaldi politikoa Xake plazako Itzubaltzeta / Romoko aldean:
Asteazken honetan, maiatzak 11, Algortan egingo du ekitaldi nazionala Bildu koalizioak. Mitinerako ordua 20:00etan jarri dute. Tokiari dagokionez, norbait "despistatu" eta "tokia beste bati" eman diotela adierazi dute Getxo udalerriko hautagaitzako kideek. Dirudienez, beste alderdi politiko baten ekitaldia izango da Telletxe plazan. Gauzak horrela, Tellagorrin emango du mitina Bilduk. Ondoko hauek hitza hartuko dute: Joseba Gezuraga Bizkaiko ahaldun nagusi izateko hautagai eta Eusko Alkartasuneko kidea, Amaia Agirresarobe Alternatibako kidea eta Maitane Nerekan tokiko alkategaia. Bitartean, Getxoko Bilduk landutako hauteskunde programa ikusgai dago jada Internet bidez. Bestalde, larunbat honetan, maiatzak 14, Barakaldoko BEC aretoa betetzera deitu dute. Bertan, kanpainako ekitaldi nagusia egingo du Eusko Alkartasunak, Alternatibak eta hautagai independenteek osatutako koalizioak. Argazkian, Maitane Nerekan Getxoko hautagaia pasa den igandean Xake plazako mitinean (mp3) bildutakoei zuzentzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun