Kiroldegiaren sagaian lorategiez hornitutako plaza jarri nahi dute, beirateen bitartez argi naturala barruraino sartzea ahalbidetzearekin batera. "Gauzak horrela, herrigunean bertan aisialdirako guneak handiagotuko ditugu, berangoztarren bizi kalitatea handituz", aipatu du Landak. Gaineratu duenez, kanpoko pasabideekin eta igogailu batekin gaindituko dute "oinordetzan hartutako" oztopo arkitektonikoa. Kirola egiteko esparruei dagokienez, igerileku klimatizatuak, gimnasioa eta erabilera anitzerako aretoak jarri nahi dituzte. Horretaz gain, "herrigunean kultur ekitaldi gehiago egin ahal izateko guneak" ere izango dira, EAJko alkategaiaren hitzetan. Hainbat lokal jarri nahi dituzte eraikinean; tartean, ostalaritza establezimendua.
Jarduera ekonomikoa sustatzeko
Landaren iritziz, ekipamendu gehiago jartzeaz gain, Berangoko herriguneko jarduera ekonomikoa sustatuko dugu". Are gehiago, "enplegua sortzeko" asmoz, ekonomia jarduerari bultzada berria emateko "ardatz nagusitzat" jarri du Sabino Arana kaleko kiroldegiaren egitasmoa EAJren hautagaiak. "Ez da proiektu isolatua, hirigintza egitura kohesionatzeko beste elementu bat gehiago baizik; Sabino Aranan bulebarra sortuz, aparkaleku kopurua areagotuz, aipatu zonaldeko merkataritza sustatuz, eta Arabeta eta Mimenagan industria jarduera bultzatuz hobetuko duguna", adierazi du Landak. Horretaz gain, auzo ezberdinak lotzeko garraio zerbitzua jarri nahi dute.
Berangon oztopo arkitektonikoak kentzea eta herrigunean kirol azpiegitura zein aisialdirako gune gehiago jartzea proposatu du Anabel Landa EAJko alkategaiak. Hauteskunde kanpainan, udal batzarrean bideratutako Sabino Arana kaleko kiroldegiaren egitasmoa aurrera ateratzeko asmoa berretsi du hautagai jelkideak. Hogei milioi euroko aurrekontua izango du horrek. Finantzatzeko, lau milioi eurotan salduko du Lantzarteko zelaia, etxebizitzak egiteko; bertan aurreikusita zegoen kiroldegiaren ordez. Daukan gehiengo osoa baliatuta, gaurko ez ohiko osoko bilkuran onartuko du salmenta EAJk. Landaren arabera, "Intxaurraga goiko aldeko eta Sabino Arana kalearen arteko alde handiak historikoki sortutako oztopo arkitektonikoak gainditzea" da egitasmoaren helburua. Herrigunean, pilotalekutik gertu, metroa estali nahi dute eraikinaren bitartez, Intxaurragako egungo aparkalekuaren azpian kiroldegia altxatzearekin batera. Argazkian, Berangoko metro geltoki ingurua.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun