Radio Euskadik zabaldu duenez, supermerkatu sare bizkaitarrak 110 milioi euro fakturatu zituen iaz. 1955ean sortu zen eta egun 50 denda eta 900 langile inguru ditu, horietariko 700 emakumezkoak eta gehienak mugagabeko kontratuarekin. Uvescok Ercoreca erosi baino lehen, enpresak administrazio eta biltegietako 82 langile kaleratzeko Enplegu Erregulazio Espedientea abiatu du.
Uvesco Taldea Gipuzkoako eta Kantabriako bi enpresen bategitearen ondorioz sortu zen duela 18 urte. Gaur egun, egoitza nagusia Irunen dute eta Hego Euskal Herrian eta Kantabrian lan egiten dute. Guztira 2.500 langile dituzte. Ercorecaren erosketarekin, guztira, 177 denda lituzkete. Bizkaian, orain arte BMk 40 denda izan ditu, haietako hamaika Uribe Kostan eta Erandion. Zehazki, lau Algortan, bina Areetan eta Erandion eta bana Getxon, Itzubaltzeta / Romon eta Leioan. Hortaz, Uvesco taldeak orain 19 supermerkatu izango lituzkeen Uribe Kosta eta Erandion, haietako zortzi Algortan eta beste zazpi Areetan. Baliteke zentro guztiak martxan ez uztea.
Bizkaiko Ercoreca supermekatuak erosi egin ditu BMk, Netto-k eta Super Amarak osatzen duten Uvesco taldeak. Radio Euskadik baieztatu du gaur goizean azken egunotan sektorean entzuten ziren salmenta zurrumurruak. BM ez ezik, Mercadona eta Eroski aipatzen ziren balizko erosle gisa. Ercorecak 50 denda eta biltegi bat ditu Bizkaian, guztira 900 behargin egiten dutela lan. Sareko zortzi supermerkatu Uribe Kostan daude, haietako erdia Algortan, hiru Areetan eta azkena Leioan. Taldeari jarritako prezioa eta baldintzak ez dituzte jakitera eman eta operazioa oraindik Espainiako Konpetentziaren Batzordearen oniritziaren zain dago. Argazkian, Algortako Azokan dagoen Ercoreca supermerkatua.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun