Bizkaiko Eskolak jardunaldia goizeko 10:30ean hasiko da eta bi jarduera izango ditu. Alde batetik, 1.500 metroko zirkuitu batean lasterketa egingo dute, Krutzejada eta Antsonekoa inguruan. Adinaren arabera, parte-hartzaileek itzuli kopuru jakin bat egin beharko dute: txikienek, bi itzuli; lehen urteko kimuek, hiru; bigarren urtekoek; lau; lehen urteko haurrek, zazpi aldiz; eta, azkenik, bigarren urteko haurrek zortzi itzuli. Hasiera batean, neskak mutilekin batera arituko dira. Hala ere, antolatzaileek jakinarazi dutenez, neskentzako lasterketa propioa egiteko prest daude, adin-tarte bakoitzean izena emandako neska kopuruak horretarako aukera ematen baldin badu. Lasterketa hasi baino ordubete lehenago, 9:30ean, eman ahal izango da izena, Urdulizko Adintsuen tabernan.
Bigarren jardueran parte hartzen dutenek, bizikleta gainean, hainbat trebezia proba egin behar izango dute. Hau da, beste zenbait jolasen artean, ginkana bat egingo dute, neska-mutilek euren abilidadea erakusteko bi gurpilen gainean. Jolas horiei esker, eskola-umeek psikomotrizitatea eta koordinazioa landu ahal izango dute.
Punta Galea Txirrindularitza Elkarteak eta Urdulizko Udalak txirrindularitzarekin konpromiso sendoa dutela azpimarratu nahi izan dute. Izan ere, urtero hiru lasterketa antolatzen dituzte herrian. Bizkaiko Eskolak jardunaldiaz gain, txirrindulariek beste bi hitzordu dituzte herrian: kadete mailako Bizkaiko Txapelketa, uztailean egiten dena; eta 23 urtetik beherakoen kategoriako lasterketa, irailean egiten dena. Azken proba hori Andra Mari egunean izaten da, irailaren zortzian, Urdulizko jaietako egunik garrantzitsuenean.
Igandean txirrindulari gazteak hartuko ditu Urdulizek
2011ko mai. 12a, 21:56
Igande honetan, hilak 15, 200 bat gaztetxok parte hartuko dute Urdulizko Bizkaiko Eskolak izeneko txirrindularitza jardunaldian. Aurrekoetan bezala, Punta Galea Txirrindularitza Elkarteak antolatuko du hamalaugarren edizio hori, tokiko Udalaren laguntzarekin. Aipatu ekimena, kirol-eskoletan edota txirrindularitza eskoletan aritzen diren Bizkaiko 8 eta 14 urte bitarteko neska-mutilei zuzenduta dago. Hala ere, antolatzaileek jakinarazi dutenez, 6 edo 7 urteko umeren bat ere egon daiteke. Jardunaldi horren espiritua ludikoa eta pedagogikoa da, "ez da lehiakorra nahiz eta, normala den moduan, parte-hartzaileek gauzak ahalik eta ondoen egin nahi izango duten", adierazi dute arduradunek. Hori dela eta, ez da sari indibidualik egongo eta parte-hartzaile guztiek, salbuespenik gabe, opari bana jasoko dute oroigarri gisa. Argazkian, iaz Berangon egindako Uribe Kostako umeen Bizikleta Festa / © Berangoko Albisteak.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun