Aurretik iragarri bezala, Koldo Martinez Berangoko EBko zinegotziak sutsuki defendatu zuen Lantzarte saltzearen kontrako jarrera. Ordezkari federalistak "amarrutzat" jo zuen hitzarmenaren onarpena hauteskundeetarako egun gutxi falta direla aurkeztu izana, bere ustez, "hurrengo udal gobernuaren jarduna baldintzatuko duelako". Landa alkateak, ordea, "erabakia behin-behinekoa" dela argudiatu zuen. Martinezek berriro mahaigaineratu zuen auzokideen artean mila sinadura bildu zirela, proiektuaren kontra. Bitartean, "botere gehiegikeriaz" jokatu izanaren akusazioei erantzun zien agintari jelkideak, Lantzarte saltzeko proposamena aurrekoetan "Udalbatzaren gehiengo zabal baten babesa" jaso izan duela aipatuz: "hiru alderdi politiko (EAJ, PSE-EE eta EA) biren kontra (PP eta EB)". Atzokoan, ordea, aurkako jarrera agertu zuen Amaia Madariaga Eusko Alkartasuneko zinegotziak, "auzokideak salmentaren kontra" daudela iritzita.
Lantzarteren inguruko udal batzarra Berangon:
Lantzarte saltzeko hitzarmena behin-behinean onartu dute Berangoko EAJk eta PSE-EEk
EAJren botoak nahikoak ziren arren, atzokoan ere PSE-EEren zinegotziak izan zituen lagun Anabel Landa Berangoko alkateak, Lantzarteko zelaia saltzeko hitzarmena behin-behinean onartzeko. Oraingo honetan, baina, ez zuen Eusko Alkartasunaren babesik jaso. Eta, aurrekoetan bezala, PP eta Ezker Batua aurka agertu ziren. Orubea Bizkaiko Foru Aldundiaren menpe dagoen Azpiegitura sozietateari lau milioi eurotan salduz, tasatutako 80 etxebizitza eta aparkalekuak eraiki nahi dituzte tokiko jelkideek, "gazteentzako mesedegarri" izango delakoan. Udal hauteskundeetarako egun gutxi falta direla, proposamena udal batzarrera eramateko erabakia ere justifikatzen ahalegindu zen Landa. Alkatearen arabera, "Aldundiak ere onartu behar du hitzarmena eta, behin hori eginda, hogei eguneko epea egongo da alegazioak aurkezteko. Ez dugu inondik inora Lantzarte bozen aurretik salduko". Hala ere, azalpenek ez zuten batzar aretoan elkartutako 40 bat auzokideen haserrea baretu. Lantzarteko Auzokide Elkarteak deituta, "auzokideen iritzia ez errespetatzea" eta "herritarrei hitza kentzea" leporatu zioten EAJren agintariari. Are ozenago osoko bilkuraren bukaeran berba egiteko aukerarik ere eman ez zienean. Berango Eraikitzen herri plataformak, Bilduk eta Ezker Batuak ere bat egin zuten protestarekin. Argazkian, kartelan eskuan agertu ziren auzokideak udal batzarrean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun