Berangoko Bilduk ekitaldi nagusia egingo du larunbatean udal pilotalekuan, eguerdiko ordu batean. Koalizioko kideen hitzetan, "Udalak jarritako trabek ezin izango dute herri honetan Bilduk sortu duen ilusioa gelditu". Salatu dutenez, Anabel Landak alkate jelkideak udal eszenatokia eta musika-ekipoa erabiltzeko eskubidea "galarazi" die. "Aipatutako herri-eszenatokia eta musika-ekipoa herriko kultur eta gizarte taldeek erabiltzen dute inolako arazorik gabe euren ekitaldiak antolatzeko. Herritar guztiena den ekipamendua berea dela uste du Berangoko EAJk", adierazi dutenez. Berangoko Bilduren ordezkariek ohartarazi dutenez, "alferrik ari dira trabak jartzen. Herri honetan sortu den ezkertiar eta abertzaleen olatua ez du alkatearen erabaki batek geldituko. Are gutxiago. Honek argi uzten digu, Lantzarteko zelaiaren ezohiko udalbatzarekin bezala, Berangok aldaketa behar duela". Argazkian, Bilduk Berangon aurkeztutako hautagaiak / cc-by-sa Bildu.
Gauzak horrela, larunbateko ekitaldia "are indar gehiagorekin" antolatuko dute. 12:30ean hasiko dira ospakizunak, pilotaleku aurrean. Bertan, kale-animazioa eta haurrentzako tailerrak egongo dira: globoflexia, aurpegiak margotzea… 13:00ean ekitaldi politikoa izango da, eta horren ostean lunchaz gozatzeko aukera egongo da. "Dena, koalizioak Berangon sortzen ari duen ilusioaz lagunduta", gaineratu dutenez. Arratsaldean, bestalde, Barakaldoko BECera joateko hitzordua jarri dute: 16:45ean Berangoko metro geltoki aurrean lotu dira berangoztar guztiek elkarrekin garraioa hartu eta BEC aretoa betetzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun